ەندى وقۋشى عىلىمدى وڭاي تۇسىنەدى
جاڭا وقۋ جىلىندا «استانا- كىتاپ» باسپاسى وتاندىق جاڭا ءونىمدى ۇسىندى. وقۋلىق تەك ءبىلىم بەرۋمەن شەكتەلمەي، تاربيەلىك مانگە دە يە، دەپ حابارلايدى Bugin.kz پورتالى.
وقۋشىنىڭ مەكتەپ قابىرعاسىندا ساپالى ءبىلىم الۋى - وقۋ باعدارلاماسىنىڭ باستى ماقساتى. ال ساپالى ءبىلىمنىڭ نەگىزگى قۇرالى، ءبىلىم الۋشىنىڭ تانىمىن كەڭەيتەتىن اقپارات كوزى - وقۋلىق.
بەلگىلى ءبىر ءپاننىڭ وقۋلىعى وقۋشىنىڭ قولىنا تۇسپەس بۇرىن كوپتەگەن زەرتتەۋلەر جۇرگىزىلىپ، قاجەتتى اقپاراتتار ساراپتالىپ، وقۋشىنىڭ قابىلداۋ دەڭگەيى زەردەلەنەدى. اۆتورلار ءارتۇرلى فاكتورلاردى ەسكەرە وتىرىپ، وقۋلىقتى قۇراستىرادى. وسى ورايدا، جاڭا وقۋ جىلىندا «استانا- كىتاپ» باسپاسى وتاندىق جاڭا ءونىمدى ۇسىندى.
باسپانىڭ ءبىلىم بەرۋ مەكەمەلەرىنە ۇسىنىپ وتىرعان جاڭا وقۋلىقتار سەرياسىنا جاراتىلىستانۋ باعىتىنداعى حيميا، بيولوگيا، فيزيكا، الگەبرا، گەومەتريا جانە 7-11-سىنىپتارعا ارنالعان ينفورماتيكا ءپانىنىڭ قوس ءتىلدى وقۋلىقتارى جاتادى.
بۇل جاراتىلىستانۋ باعىتىنداعى قوس ءتىلدى وقۋلىقتاردىڭ ەرەكشەلىگى - وقۋشى العاشقى بەتىنەن باستاپ، وقۋلىقتىڭ اعىلشىن جانە قازاق/ورىس تىلىندە ەكەنىن بايقايدى. وقۋلىقتا تەرميندەر مەن تىرەك سوزدەر ءۇش تىلدە بەرىلىپ، وقۋشىنىڭ ەكى تىلدە دە سوزدىك قورىن كەڭەيتۋگە ىقپال ەتەدى. اقپاراتتىڭ كۇردەلىلىگى سىنىپ دەڭگەيىنە سايكەس ارتىپ وتىرادى.
وقۋلىقتا كوپتەگەن ۆيزۋالدى قۇرالدار ۇسىنىلىپ، ماتەريالدار تۇسىنىكتى ءارى جەڭىل يگەرىلەدى. جاڭا تاقىرىپتى مەڭگەرە وتىرىپ، وقۋشى حيميانىڭ تەك فورمۋلالارمەن شەكتەلمەيتىنىن، ونىڭ قورشاعان ورتامەن تىعىز بايلانىستى ەكەنىن تۇسىنەدى. بۇل پانگە دەگەن قىزىعۋشىلىقتى ارتتىرادى.
سونداي-اق وقۋلىقتا سىني تۇرعىدان ويلاۋعا، فۋنكتسيونالدى ساۋاتتىلىقتى ارتتىرۋعا ارنالعان ءفورماتيۆتى باعالاۋ تاپسىرمالارى بار. بۇل جاتتىعۋلار توپتىق جۇمىستا ءوز ويىن جەتكىزۋگە، تاقىرىپتى تەرەڭىرەك تۇسىنۋگە كومەكتەسەدى.
ءاربىر ءبولىمنىڭ سوڭىندا جانە وقۋلىقتى اياقتاعان كەزدە وقۋشىلارعا ءوزىن-ءوزى باعالاۋ ءۇشىن سۋمماتيۆتى تاپسىرمالار ۇسىنىلادى. بۇل تاپسىرمالار ارقىلى وقۋشى ءوز ءبىلىمىن باعالاپ، قاي تۇستا قينالعانىن انىقتاي الادى.
وقۋلىق تەك ءبىلىم بەرۋمەن شەكتەلمەي، تاربيەلىك ماڭگە دە يە. وندا ۇلكەندەرگە قۇرمەت كورسەتۋ، ۇلتتار اراسىنداعى تەڭدىك جانە سالاۋاتتى ءومىر سالتىن دارىپتەيتىن ماتىندەر دە كەزدەسەدى. وقۋشىلار عىلىمنىڭ قۇندىلىقتارمەن تىعىز بايلانىسىن بايقاي الادى. ءاربىر جاراتىلىستانۋ ءپانىنىڭ وقۋلىعى وقۋشىنىڭ بولاشاق ماماندىعىن تاڭداۋعا العاشقى قادام بولادى. وقۋلىقتاردا بولاشاقتا قولدانۋعا لايىقتالعان تاپسىرمالار مەن مىسالدار بار، بۇل وقۋشىلارعا ءوز باعىتتارىن ايقىنداۋعا سەپتىگىن تيگىزەدى.
