ەندى پوليتسيا اۋرۋحانالاردى تاۋلىك بويى كۇزەتەدى
استانا. KAZINFORM - استانا قالاسىنىڭ التى ستاتسيونارىندا مەديتسينا جۇمىسكەرلەرىنىڭ قاۋىپسىزدىگىن قامتاماسىز ەتۋ ءۇشىن تاۋلىك بويى قىزمەت كورسەتەتىن كۇزەت بەكەتتەرى ۇيىمداستىرىلدى. بۇل تۋرالى قالالىق دەنساۋلىق ساقتاۋ باسقارماسى ءمالىم ەتتى.
اتالعان شارا پاتسيەنتتەرمەن بىرگە كەلەتىن ادامداردىڭ مەديتسينالىق پەرسونالعا قول جۇمساپ، زيان كەلتىرەتىن جاعدايلاردىڭ جيىلەۋىنە بايلانىستى قابىلدانعان.
قوعامدىق دەنساۋلىق ساقتاۋ باسقارماسىنىڭ حابارلاۋىنشا، كۇزەتتى ءى ءى م جۇيەسىنە كىرەتىن پوليتسيا دەپارتامەنتى جانىنداعى مامانداندىرىلعان كۇزەت قىزمەتىنىڭ ماماندارى قامتاماسىز ەتەدى.
- مەديتسينا جۇمىسكەرلەرىن قۇقىقتىق تۇرعىدان قورعاۋدى كۇشەيتۋ جانە قاۋىپسىز ەڭبەك جاعدايلارىن جاساۋ ماقساتىندا پوليتسيا دەپارتامەنتىمەن بىرلەسىپ تاۋلىك بويى كۇزەت بەكەتتەرى ۇيىمداستىرىلدى. پوليتسيا قىزمەتكەرلەرى وقىس وقيعالار ءجيى بولاتىن قابىلداۋ بولمەلەرىندە كەزەكشىلىك قىزمەتىن اتقاراتىن بولادى. ازاماتتاردىڭ قۇقىققا قايشى كەلەتىن ارەكەتتەرى تۋىنداعان جاعدايدا پوليتسيا قىزمەتكەرلەرى ولاردىڭ الدىن الۋ ءۇشىن زاڭ اياسىندا ارەكەت ەتۋگە قۇقىلى. سوڭعى كەزدەرى دارىگەرلەرگە قاتىستى نەگىزسىز سيپاتتاعى اگرەسسيالىق جاعدايلار ءجيى بولادى. دارىگەر اۋىر جاراقات العان قوستاناي وبلىسىنداعى سوڭعى رەزونانستىق جاعداي وسىنداي شارالاردىڭ قاجەتتىلىگىن راستايدى، - دەپ اتاپ ءوتتى قوعامدىق دەنساۋلىق ساقتاۋ باسقارماسى باسشىسىنىڭ ورىنباسارى قادىر جاراسبايەۆ.
بۇگىندە كۇزەت بەكەتتەرى ەرەسەكتەرگە ارنالعان ءۇش قالالىق كوپسالالى اۋرۋحانادا، №2 قالالىق بالالار اۋرۋحاناسىندا جانە ەكى رەسپۋبليكالىق كلينيكادا ۇيىمداستىرىلدى.
جاقىن ارادا پوليتسيا دەپارتامەنتىمەن بىرلەسىپ №1 جانە №3 كوپسالالى بالالار اۋرۋحانالارىندا، سونداي-اق قالالىق پەريناتالدىق ورتالىقتا كۇزەت بەكەتتەرىن ورناتۋ ماسەلەسى پىسىقتالىپ جاتىر.
مەديتسينا جۇمىسكەرلەرى اتالعان باستامانى قولداپ، ونىڭ قاۋىپسىز جانە تۇراقتى جۇمىس ورتاسىن قۇرۋعا ىقپال ەتەتىنىن اتاپ ءوتتى.
- قاۋىپسىزدىك بەكەتتەرى - ءبىزدىڭ ءىس جۇزىندە قورعالعانىمىزدىڭ بەلگىسى. قابىلداۋ بولىمىندە تاۋلىگىنە ءتۇرلى جاراقاتتارى بار، ءارتۇرلى جاعدايدى باسىنان وتكەرگەن 400-گە جۋىق ادام جۇگىنەدى. ءبىز پاتسيەنتتەردىڭ عانا ەمەس، سونىمەن قاتار ولاردىڭ تۋىستارىنىڭ دا اگرەسسياسىنا تاپ بولامىز. بارلىعى شۇعىل كومەكتى قاجەت ەتەدى، ال مەديتسينالىق كومەك Triage سۇرىپتاۋ جۇيەسى بويىنشا جۇزەگە اسىرىلاتىنى ەسكەرىلمەيدى. ءار پاتسيەنتتىڭ وزىندىك «باسىمدىق دارەجەسى» بار. ءبىراق، وكىنىشكە وراي، دارىگەرگە دەگەن قۇرمەت جوق، - دەدى №2 كوپسالالى قالالىق اۋرۋحانانىڭ قابىلداۋ ءبولىمىنىڭ مەڭگەرۋشىسى ءمادينا تابىلدى قىزى.
ەسكە سالا كەتەيىك، قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ فيزيكالىق كۇش قولدانىپ، مەديتسينا جۇمىسكەرلەرىنە قاتىگەزدىك تانىتقان ءۇشىن جازانى قاتاڭداتۋدى تاپسىرعانىن جازعان ەدىك.
