ەندى قازاقستاندىقتاردىڭ ءال-اۋقات دەڭگەيى جاڭا جۇيەمەن ولشەنەدى
استانا. KAZINFORM - الەۋمەتتىك جاردەماقى تاعايىنداۋ كەزىندە وتباسىنىڭ ءال-اۋقات دەڭگەيى 23 الەۋمەتتىك-دەموگرافيالىق جانە ەكونوميكالىق كورسەتكىشتەر بويىنشا انىقتالادى. بۇگىندە پيلوتتىق جوبا ىسكە قوسىلدى.
جاڭا ءتارتىپتى ەڭبەك جانە حالىقتى الەۋمەتتىك قورعاۋ مينيسترلىگىنە قاراستى الەۋمەتتىك كومەك دەپارتامەنتىنىڭ باس ساراپشىسى التىناي سەيسەمبايەۆا ءتۇسىندىرىپ بەردى.
- شىمكەنت قالاسى مەن قاراعاندى وبلىسىندا 6 مەملەكەتتىك ورگان ارقىلى كورسەتىلەتىن 11 مەملەكەتتىك قىزمەت ءبىرىڭعاي سيفرلىق پلاتفورما ارقىلى ۇسىناتىن پيلوتتىق جوبانى جۇزەگە اسىرىلا باستادى. بۇل جەرگىلىكتى اتقارۋشى ورگاندار تاراپىنان كورسەتىلەتىن قوسىمشا قولداۋ شارالارىنا قاتىستى. ونىڭ ىشىندە مەكتەپتەگى تەگىن تاماقتانۋ، ستۋدەنتتەرگە ارنالعان جاتاقحانا، بالالار لاگەرىنە جولداما، تۇرعىن ءۇي كومەگى جانە باسقا دا قولداۋ شارالارى كىرەدى. ولاردى تاعايىنداۋ كەزىندە وتباسىنىڭ ءال-اۋقات دەڭگەيى 23 الەۋمەتتىك-دەموگرافيالىق جانە ەكونوميكالىق كورسەتكىشتەر بويىنشا انىقتايتىن ۇلگى قولدانىلادى، - دەيدى التىناي سەيسەمبايەۆا.
مينيسترلىك ساراپشىسىنىڭ مالىمدەۋىنشە، اتالعان ۇلگى نەگىزىندە وتباسىنىڭ تابىسى، مۇلكى، نەسيەسى، سونداي-اق دەنساۋلىق جاعدايى تەكسەرىلەدى.
- ودان بولەك، كولەڭكەلى تابىسى، مىسالى، بەيرەسمي جۇمىس ىستەۋ سياقتى ماتەريالدىق ەمەس فاكتورلار ەسكەرىلەدى. پيلوتتىق جوبا اياسىندا وتباسىلاردىڭ ءال-اۋقات دەڭگەيى بويىنشا 6 ساناتقا جىكتەلەدى. شەشىم وتباسىنىڭ سيفرلىق كارتاسى ارقىلى جيناقتالعان وبەكتيۆتى دەرەكتەر نەگىزىندە اۆتوماتتى تۇردە قابىلدانادى. ەگەر وتباسىندا 2 نەمەسە ودان دا كوپ تۇرعىن ءۇي، 2 نەمەسە ودان دا كوپ اۆتوكولىك بولسا جانە وتباسىنىڭ ءار مۇشەسىنە شاققاندا ورتاشا ايلىق تابىس 4 ەڭ تومەن كۇنكورىس دەڭگەيىنەن اسىپ كەتسە، ول وتباسى 6 ساناتتى ءال-اۋقاتتى وتباسىلار قاتارىنا جاتقىزىلادى. اتالعان وتباسىلار جەرگىلىكتى اتقارۋشى ورگانداردىڭ بيۋدجەت ەسەبىنەن كورسەتىلەتىن قوسىمشا الەۋمەتتىك قولداۋ الۋشىلار تىزىمىنەن شىعارىلۋى مۇمكىن. پيلوتتىق جوبانى ەنگىزۋ بالا تۋعاندا جانە بالا 1,5 جاسقا تولعانعا دەيىن ونىڭ كۇتىمىنە بايلانىستى جاردەماقىعا، كوپبالالى جانە ماراپاتتالعان انالارعا، مۇگەدەكتىگى بار بالانى تاربيەلەپ وتىرعان جاندارعا بەرىلەتىن جاردەماقىعا قاتىسى جوق. سونىمەن قاتار اسىراۋشىسىنان ايىرىلعان جاعدايدا تاعايىندالاتىن جاردەماقىعا اسەر ەتپەيدى. رەسپۋبليكالىق بيۋدجەتتەن تولەنەتىن زەينەتاقى، بارلىق جاردەماقى، اتاۋلى الەۋمەتتىك كومەك، سونداي-اق مەملەكەتتىك-الەۋمەتتىك ساقتاندىرۋ قورىنان تولەنەتىن 5 ءتۇرلى تولەم بۇرىنعى تارتىپپەن كورسەتىلەدى، - دەپ ءتۇسىندىردى مامان.
ايتا كەتەيىك، ەلىمىزدە جىل باسىنان بەرى 4,7 ميلليون ادامعا الەۋمەتتىك تولەم بەرىلدى.
ەسكە سالايىق، وتكەن جىلى بيۋدجەتتەن الەۋمەتتىك تولەمدەرگە 5,3 تريلليون تەڭگە ءبولىندى.
