ەندى قازاقستاندىقتار جاڭا پاسپورت العاندا، ەسكىسىن تاپسىرادى

استانا. KAZINFORM - ىشكى ىستەر مينيسترلىگى قازاقستان رەسپۋبليكاسى ازاماتىنىڭ پاسپورتىنىڭ رەسىمدەلۋ، بەرىلۋ، اۋىستىرىلۋ، تاپسىرۋ، الىپ قويۋ جانە جويۋ قاعيدالارىنا وزگەرىستەر ەنگىزۋدى كوزدەيتىن بۇيرىق جوباسىن ازىرلەدى. قۇجات جوباسى «اشىق ن ق ا» پورتالىندا جاريالاندى.

- قازىر جارامسىز قۇجاتتاردى قايتا پايدالانۋ فاكتىلەرى انىقتالىپ جاتىر. وسى سەكىلدى فاكتىلەردى بولدىرماۋ ماقساتىندا، جاڭا پاسپورتتى رەسىمدەۋ كەزىندە ەسكى پاسپورتتى دەرەۋ الىپ قويۋ ۇسىنىلادى. ال پاسپورتتى ۋاقىتشا پايدالانۋ قاجەت بولعان جاعدايدا (جاڭاسىن العانعا دەيىن) ازاماتتارعا سەبەبىن كورسەتە وتىرىپ، ەرىكتى ءوتىنىش جازۋ نەگىزىندە ەسكى پاسپورتتى قولىندا قالدىرۋ مۇمكىندىگى بەرىلەدى، - دەلىنگەن قۇجات ماتىنىندە.

سونداي-اق ىشكى ىستەر مينيسترلىگى اتالعان جوبانى قابىلداۋ تەرىس الەۋمەتتىك-ەكونوميكالىق جانە قۇقىقتىق نەمەسە وزگە دە سالدارلارعا اكەپ سوقپايتىنىن، سونداي-اق ۇلتتىق قاۋىپسىزدىككە تەرىس اسەر ەتپەيتىنىن حابارلاپ وتىر.

قۇجات جوباسى 2025 -جىلعى 26 -مامىرعا دەيىن قوعامدىق تالقىلاۋعا ۇسىنىلدى.

Kazinform ءتىلشىسى قازاقستان پاسپورتىنىڭ ساپاسى مەن سيپاتىنا تالداۋ جاساعان ەدى.

ايتا كەتەيىك، قازاقستاندا پاسپورتتىڭ 3 ءتۇرى قولدانىلادى: جالپى ازاماتتىق، قىزمەتتىك جانە ديپلوماتيالىق.

اۆتور

داۋلەت ىزتىلەۋ