ەندى مەيىرگەر دە كەڭەس بەرەدى: جاڭا جۇيە قالاي جۇمىس ىستەيدى؟

استانا. KAZINFORM - قازاقستاندا مەديتسينالىق-سانيتاريالىق العاشقى كومەك ۇيىمدارىندا مەيىرگەرلىك قابىلداۋ ەنگىزىلدى. بۇل ءتاسىل دارىگەر جۇكتەمەسىن ازايتىپ، مەديتسينالىق كومەكتىڭ قولجەتىمدىلىگىن ارتتىرۋعا جانە الدىن الۋ شارالارىن كۇشەيتۋگە مۇمكىندىك بەرەدى.

دەنساۋلىق ساقتاۋ مينيسترلىگىنىڭ مالىمەتىنشە، جاڭا تاجىريبە دارىگەردى اكىمشىلىك جانە قوسالقى فۋنكسيالاردان بوساتىپ، پاتسيەنتتەرگە زەرتتەۋ ناتيجەلەرى مەن ءدارى-دارمەكتى ۋاقتىلى الۋعا جول اشادى.

مەيىرگەر ءىسى جونىندەگى شتاتتان تىس باس مامان كۇلزي ابەنوۆا مەيىرگەرلەردىڭ وكىلەتتىگىن كەڭەيتۋ اۋرۋلاردى ەرتە انىقتاپ، اسقىنۋلاردىڭ الدىن الۋعا وڭ اسەر ەتەتىنىن اتاپ ءوتتى.

مەيىرگەرلىك دياگنوز نەنى بىلدىرەدى؟

مەيىرگەر دارىگەرلىك دياگنوز قويمايدى. ونىڭ مىندەتى - ناۋقاستىڭ ناقتى شاعىمىنا سايكەس مەيىرگەرلىك دياگنوز قويۋ. مىسالى: «ۇزاق جوتەل»، «قىشۋ»، «اياقتىڭ ءىسىنۋى»، «قان قىسىمىنىڭ جوعارىلاۋى». بۇل دياگنوزدار دەنساۋلىق ساقتاۋ سالاسىنداعى №149 بۇيرىقپەن رەتتەلىپ، ارنايى كودتالادى.

مەيىرگەر نە ىستەي الادى؟

جاڭا ۇلگىدەگى مەيىرگەرلەردىڭ فۋنكسيونالدىق مىندەتتەرىنە مىنالار كىرەدى:

دارىگەرگە دەيىنگى تەكسەرۋ جۇرگىزۋ (قان قىسىمىن ولشەۋ، تەرى مەن ليمفا تۇيىندەرىن تەكسەرۋ)؛

اۋىز قۋىسى مەن ءسۇت بەزدەرىن قاراپ، ونكولوگيالىق اۋرۋ بەلگىلەرىن انىقتاۋ؛

ساۋالنامالار ارقىلى جۇرەك-قان تامىرلارى، وكپە، اسقازان-ىشەك اۋرۋلارىنىڭ قاۋىپتەرىن باعالاۋ؛

ينفاركت پەن ينسۋلت قاۋپى بار پاتسيەنتتەردى انىقتاۋ (ە ك گ، حولەستەرين دەڭگەيى، ليپيدتى سپەكتر)؛

قانت ديابەتى بار ادامداردى باقىلاۋ (قانت دەڭگەيى، اياق كۇتىمى، تاماقتانۋ بويىنشا كەڭەس بەرۋ)؛

پاتسيەنتتەردى سكرينينگكە جانە ۆاكسيناتسياعا شاقىرۋ؛

ديناميكالىق باقىلاۋداعى ناۋقاستار ءۇشىن قوسىمشا جوسپار ازىرلەۋ.

ءدارى-دارمەككە رەتسەپت جازۋ وكىلەتتىگى

مەيىرگەر ءوز بەتىنشە ءدارى-دارمەك تاعايىنداي المايدى. الايدا ديسپانسەرلىك ەسەپتە تۇرعان پاتسيەنتتەرگە (مىسالى، گيپەرتونيا نەمەسە قانت ديابەتىمەن اۋىراتىندار) دارىگەر الدىن الا تاعايىنداعان دارىلەرگە ەلەكتروندىق رەتسەپت جازا الادى.

ساۋاتتىلىق پەن الدىن الۋ - باستى نازاردا

مەيىرگەرلەر پاتسيەنتتەرگە دۇرىس تاماقتانۋ، جەكە كۇتىم، اسقىنۋدىڭ الدىن الۋ (اسىرەسە ديابەت كەزىندە) سياقتى ماڭىزدى تاقىرىپتاردا كەڭەس بەرىپ، ءومىر ساپاسىن ارتتىرۋعا كومەكتەسەدى.

جاڭا جۇيەنىڭ ارتىقشىلىقتارى

كەڭەيتىلگەن پراكتيكا مەيىرگەرىنىڭ جۇمىسى كەلەسى تيىمدىلىكتەردى كورسەتۋدە:

دارىگەرگە تۇسەتىن جۇكتەمەنى ازايتادى؛

پاتسيەنتتەردىڭ ۋاقىتىن ۇنەمدەيدى؛

كلينيكالىق زەرتتەۋلەرگە جولداما الۋدى جەدەلدەتەدى؛

دارىگەرلەردىڭ كۇردەلى پاتسيەنتتەرگە كوبىرەك كوڭىل بولۋىنە مۇمكىندىك بەرەدى.

مانساپتىق ءوسۋ جۇيەسى

مينيسترلىك مەيىرگەرلەر ءۇشىن كوپساتىلى كاسىبي ءوسۋ جۇيەسىن ەنگىزۋدە: كىشى مەيىرگەر، جالپى پراكتيكا مەيىرگەرى، كەڭەيتىلگەن وكىلەتتىگى بار مەيىرگەر.

- جاڭا فورماتسياداعى مەيىرگەر - بۇل دارىگەردىڭ سەرىكتەسى. ول ءوزىنىڭ قۇزىرەتىن ارتتىرا وتىرىپ، پاتسيەنتتىڭ دەنساۋلىعىنا قاتىستى ماسەلەلەردى شەشۋدە بەلسەندى ءرول اتقارۋى ءتيىس، - دەيدى ۆەدومستۆو وكىلدەرى.

ايتا كەتەيىك، بۇعان دەيىن دە ەلىمىزدىڭ دەنساۋلىق ساقتاۋ جۇيەسىندە مەيىرگەرلەردىڭ ءرولى ەداۋىر ارتقانىن جازعانبىز.