ەندى ەلوردادا جول ەرەجەسىن Sergek دروندار باقىلايدى

استانا. KAZINFORM - استانادا Sergek دروندارى سىناقتان ءوتىپ جاتىر. بۇل تۋرالى Sergek Group كومپانياسىنىڭ باسپا ءسوز قىزمەتى حابارلادى.

اقپاراتتا ايتىلعانداي، Sergek جۇيەسىمەن ينتەگراتسيالانعان درونداردى قولدانۋ ناقتى ۋاقىت رەجيمىندە جول ەرەجەسىن بۇزعانداردى، اليمەنت تولەمەگەندەر مەن بورىشكەرلەردى انىقتاۋعا، اقپاراتتى پوليتسيا پلانشەتىنە جىلدام جەتكىزۋگە جانە سول ارقىلى قۇقىق قورعاۋ ورگاندارىنىڭ جۇمىس تيىمدىلىگىن ارتتىرۋعا جول اشادى.

- ءبىزدىڭ ماقسات - جولداعى قاۋىپسىزدىك. ينتەللەكتۋالدى بەينەباقىلاۋ جۇيەسىمەن جابدىقتالعان دروندار ناقتى ۋاقىتتا زاڭ بۇزۋشىلىقتى تىركەپ، ەرەجەنى بۇزعان كولىكتى تابۋعا جانە مالىمەتتى جەدەل پاترۋل قىزمەتىنە جەتكىزۋگە مۇمكىندىك بەرەدى. بۇل تەك جەدەل ارەكەت ەتۋ عانا ەمەس، جول اپاتى سانىن ازايتىپ، جولداعى ءتارتىپتى كۇشەيتۋگە ىقپال ەتەتىن شەشىم، - دەدى ىشكى ىستەر مينيسترلىگى اقپاراتتاندىرۋ جانە بايلانىس دەپارتامەنتىنىڭ باستىعى، پوليتسيا پولكوۆنيگى سەرگەي ۆارگو.

سىناق اياسىندا Sergek Group ازىرلەۋشىلەرى ىشكى ىستەر مينيسترلىگى جانە «قازتەلەكوم» ا ق وكىلدەرىمەن بىرلەسە وتىرىپ، درونداردى ءارتۇرلى باعىتتا سىنايدى. اتاپ ايتقاندا، پاترۋلدەۋ فورماتىنان باستاپ ناقتى باعىتتالعان ىزدەستىرۋگە دەيىن. ەگەر ناتيجەلەر وڭ بولسا، اتالعان جوبا باسقا وڭىرلەرگە دە كەڭەيتىلۋى مۇمكىن.

- بۇگىندە دروندار ەلدىڭ سيفرلىق ينفراقۇرىلىمىنىڭ اجىراماس بولىگى. ولار ازاماتتار مەن قوعامنىڭ قاۋىپسىزدىگىن قامتاماسىز ەتۋگە ىقپال ەتىپ جاتىر. دروندار تابيعي قۇبىلىستاردى باقىلاۋدا جانە قوعامدىق ءتارتىپتى قاداعالاۋدا بۇرىننان قولدانىلادى. وسى ورايدا «قازتەلەكوم» كومپانياسى درونداردى بەينەباقىلاۋ جۇيەسىنە، ونىڭ ىشىندە قالالىق ورتا مونيتورينگى مەن ورمان القاپتارىنداعى ءورتتىڭ الدىن الۋ باعىتىنداعى جوبالارعا ەنگىزۋ جۇمىسىن جۇرگىزىپ جاتىر. بۇل تەحنولوگيانى قولدانۋ اۋقىمى الداعى ۋاقىتتا تەك كەڭەيە بەرمەك، - دەيدى «قازاقتەلەكوم» ا ق باسقارما ءتوراعاسى باعدات مۋسين.

سونداي-اق، رەسمي حابارلامادا Sergek جۇيەسىمەن جابدىقتالعان درونداردى قولدانۋ سيفرلىق قاۋىپسىزدىكتىڭ جاڭا دەڭگەيى ەكەنى ايتىلعان. بۇل تەحنولوگيا پوليسيانىڭ ارەكەت ەتۋ جىلدامدىعىن ارتتىرىپ قانا قويماي، قابىلداناتىن شەشىمنىڭ ناقتىلىعىن دا كۇشەيتەدى.

- ءبىز ءاردايىم جاڭا تەحنولوگيالىق سىناققا اشىقپىز. Sergek جۇيەسىمەن جابدىقتالعان درونداردى قولدانۋ بولاشاققا قادام عانا ەمەس، قازاقستاننىڭ IT سالاسى الەمدىك دەڭگەيدەگى شەشىمدى ازىرلەپ، ىسكە اسىرا الاتىنىنىڭ ايقىن دالەلى، — دەدى Sergek Group كومپانياسىنىڭ باس ديرەكتورى ەۆگەنيي كيم.

بيىل كوكتەمدە Sergek ITS ماماندارى قازاقستاننىڭ ەكى ءىرى قالاسى - استانا مەن الماتىداعى كولىك قوزعالىسىن سارالاپ، ەڭ ءجيى تىركەلگەن كولىك ماركالارى مەن مودەلدەرى تۋرالى اقپارات تاراتقان ەدى

ەسكە سالايىق، جىل باسىنان الماتىدا Sergek كامەرالارى اۆتوتۇراق ەرەجەلەرىن بۇزعان كولىكتەردى انىقتاپ جاتىر.