ەندى جۇبايىڭىزدىڭ كەلىسىمىنسىز نەسيە الا المايسىز
استانا. KAZINFORM - بانكتىك قارىز نەمەسە ميكرونەسيە بەرۋگە جۇبايىنىڭ كەلىسىمىن الۋ قاعيدالارى بەكىتىلدى.
قارجى نارىعىن رەتتەۋ جانە دامىتۋ اگەنتتىگى «جەكە تۇلعاعا بانكتىك قارىز نەمەسە ميكروكرەديت بەرۋگە جۇبايىنىڭ (زايىبىنىڭ) كەلىسىمىن الۋ قاعيدالارىن، جەكە تۇلعاعا بانكتىك قارىز نەمەسە ميكروكرەديت الۋعا جۇبايىنىڭ (زايىبىنىڭ) كەلىسىمى قاجەت بولاتىن بانكتىك قارىزدىڭ نەمەسە ميكروكرەديتتىڭ ەڭ تومەنگى مولشەرىن بەكىتۋ تۋرالى» اگەنتتىك باسقارماسىنىڭ 2024-جىلعى 16-تامىزداعى 55-قاۋلىسىن قابىلدادى.
قاۋلىعا سايكەس جۇبايىنىڭ كەلىسىمى قاجەت بولاتىن بانكتىك قارىزدىڭ نەمەسە ميكرونەسيەنىڭ ەڭ تومەنگى مولشەرى 1000 ا ە ك مولشەرىندە (2024-جىلى 3 ميلليون 692 مىڭ تەڭگە) بەكىتىلدى.
بانكتىك قارىز نەمەسە ميكروكرەديت شارتىنا قول قويماس بۇرىن بانك نەمەسە م ق ۇ كليەنتتىڭ تىركەلگەن نەكەسىنىڭ (ەرلى-زايىپتىلىعىنىڭ) بولۋى تۋرالى اقپاراتتى ادىلەت مينيسترلىگىنىڭ اقپاراتتىق جۇيەسى ارقىلى تەكسەرەدى. اقپارات راستالعان جاعدايدا جانە ەگەر نەسيە سوماسى بەلگىلەنگەن شەكتەن اسىپ كەتسە، كرەديتور جۇبايىنىڭ (زايىبىنىڭ) بانكتىك قارىز نەمەسە ميكروكرەديت بەرۋگە كەلىسىمىن الۋعا مىندەتتى، - دەلىنگەن حابارلامادا.
كەلىسىم ەركىن جازباشا تۇردە بانك بولىمشەلەرىندە نەمەسە ميكروقارجى ۇيىمىنىڭ فيليالىندا قاعاز جۇزىندە نە ەلەكتروندى تۇردە راسىمدەلەدى. سونداي-اق، كەلىسىمدى بانكتىڭ موبيلدى قوسىمشاسى ارقىلى نەمەسە ەلەكتروندى ۇكىمەتتىڭ ۆەب-پورتالى ارقىلى راسىمدەۋگە بولادى.
بۇعان قوسا، زاڭدا قارىز الۋشىنىڭ جۇبايىنىڭ كەلىسىمىنسىز بەرىلگەن قارىزدى نەسيە بەرۋشىنىڭ ەسەپتەن شىعارۋ مىندەتى كوزدەلەدى.
تۇزەتۋلەر بيىلعى 1-قىركۇيەكتەن باستاپ قولدانىسقا ەنگىزىلەدى.
