ەندى اۆتوكولىكتەر الماتىعا اقى تولەپ كىرەدى
الماتى. KAZINFORM - الماتىعا كىرەتىن اۆتوكولىكتەر اقى تولەسە عانا كىرە الاتىن بولادى. قالا بيلىگى بۇل باستاما جول قوزعالىسىن جەڭىلدەتىپ، ەكولوگيالىق جاعدايدى جاقسارتادى دەپ وتىر. بۇل تۋرالى Jibek Joly ارناسىنىڭ جاڭالىقتارىندا ايتىلدى.
الداعى جازدا قالا ورتالىعىنداعى اۆتوتۇراق باعاسى دا قىمباتتايدى. بۇل شارا قانشالىقتى ءتيىمدى بولماق، جانە قالا تۇرعىندارى بۇعان نە دەيدى؟
رەسمي دەرەككە سايكەس، كۇن سايىن الماتىعا قالا سىرتىنان 250 مىڭعا جۋىق اۆتوكولىك كىرەدى. بۇل كەپتەلىس، اۋا لاستانۋى جانە اۆتوتۇراق تاپشىلىعىنا اكەلىپ سوعادى. ماسەلەنى شەشۋ ءۇشىن بيلىك ەكولوگيالىق ستاندارتتارعا ساي ەمەس كولىكتەر ءۇشىن قالاعا كىرۋدى اقىلى ەتۋدى ۇسىنىپ وتىر.
- بىرىنشىدەن، ءبىز اۆتوتۇراق باعاسىن ەداۋىر كوتەرەمىز. بۇل الەمنىڭ ءىرى قالالارىندا كەڭىنەن قولدانىلاتىن تاجىريبە. 2027 -جىلدان باستاپ العاشقى شەكتەۋلەر ەنگىزىلە باستايدى، ءبىراق ولار تولەم جۇيەسى ارقىلى جۇزەگە اسىرىلادى. مىسالى، ەگەر كولىك الماتىدا تىركەلگەنىمەن، ەكولوگيالىق ستاندارتتارعا ساي كەلمەسە، وندا كەيبىر ايماقتارعا، اتاپ ايتقاندا، شىعىس اينالما جولىنا شىعىس جاعىنان كىرۋ اقىلى بولۋى مۇمكىن، - دەيدى الماتى قالاسىنىڭ اكىمى ەربولات دوسايەۆ.
مۇنداي جۇيە باسقا ەلدەردە، مىسالى، لوندوندا بار. ول جەردە قالا ءۇش ايماققا ءبولىنىپ، ەكولوگيالىق تالاپتارعا ساي كەلمەيتىن كولىكتەر ءۇشىن بەلگىلى ءبىر جەرلەرگە كىرۋ اقىلى ەتىلگەن.
- جاسىل ايماققا ەركىن كىرۋگە جانە اۆتوكولىكتى تۇراققا قويۋعا بولادى. سارى ايماققا كىرۋ ءۇشىن شامامەن 20 فۋنت ستەرلينگ تولەۋ قاجەت. ال قىزىل ايماق قالانىڭ ەڭ ورتالىعى، وعان كىرۋ ءۇشىن 40 فۋنت ستەرلينگ تولەۋ كەرەك، - دەيدى اۆتوەكسپەرت ارسەن شاكۋوۆ.
ايتا كەتەيىك، ەلەكتروموبيلدەر مەن ەكولوگيالىق تازا كولىكتەرگە ەش شەكتەۋ بولمايدى. سونداي-اق، بيىلعى كۇزدە ينتەللەكتۋالدى كولىك جۇيەسى ىسكە قوسىلىپ، قالاعا كىرۋدى قاداعالاۋ مەحانيزمى ەنگىزىلەدى.
- بۇل تاجىريبەنى قولدانۋعا بولادى، اسىرەسە، ونى بىردەن ەمەس، ءبىر-ەكى جىل ىشىندە كەزەڭ-كەزەڭىمەن ەنگىزۋ جوسپارلانىپ وتىرعانىن ەسكەرسەك. وسى ۋاقىت ارالىعىندا قاسكەلەڭ، تالعار جانە قونايەۆ باعىتتارىندا كولىك- اۋىستىرىپ وتىرۋ توراپتارى سالىناتىن بولادى، - دەيدى اۆتوەكسپەرت ارسەن شاكۋوۆ.
قابىلدانعان شارالار كولىك قوزعالىسىن جەڭىلدەتىپ، ەكولوگيانى جاقسارتۋعا باعىتتالعان، ءبىراق ولاردىڭ تيىمدىلىگى ۋاقىت ەنشىسىندە جانە تۇرعىنداردىڭ بەيىمدەلۋىنە بايلانىستى.
بۇعان دەيىن حابارلانعانداي، الماتىداعى اۆتوتۇراق تۋرالى ساراپشىلار پىكىر ءبىلدىردى.
