ەندى الكوگول جۇمىس ۋاقىتى شەكتەۋلى ارنايى دۇكەندەردە دە عانا ساتىلۋى مۇمكىن

استانا. KAZINFORM - ىشكى ىستەر مينيسترلىگى الكوگول ونىمدەرىن ساتۋعا باقىلاۋدى كۇشەيتۋدى ۇسىنىپ وتىر.

اتالعان ماسەلەنى ۇكىمەت جانىنداعى قۇقىقبۇزۋدىڭ الدىن الۋ جونىندەگى ۆەدومستۆوارالىق كوميسسيانىڭ وتىرىسىندا ىشكى ىستەر ءمينيسترى ەرجان سادەنوۆ كوتەردى.

- قوعامدىق ورىنداردا الكوگول ىشۋگە قاتىستى 107 مىڭ قۇقىقبۇزۋدىڭ جولى كەسىلدى. 11 مىڭ ادامعا الكوگول قولدانۋعا تىيىم سالىندى. قوعامدا ىشىمدىككە توزبەۋ جاعدايىن قالىپتاستىرۋعا جۇرتشىلىق تارتىلىپ جاتىر. بۇگىندە 402 ەلدى مەكەن تۇرعىندارى الكوگولدەن باس تارتتى، - دەدى ەرجان سادەنوۆ كوميسسيا وتىرىسىندا.

سونداي-اق ماسكۇنەمدىك ماسەلەسىن شەشۋ كەشەندى ءتاسىلى قاجەتتىگى ايتىلدى.

ىشكى ىستەر مينيسترلىگىنىڭ مالىمەتىنە سۇيەنسەك، بيىل پوليتسيا الكوگول اينالىمى سالاسىندا 7 مىڭعا جۋىق زاڭ بۇزۋشىلىقتىڭ جولىن كەستى. كاسىپكەرلىك سۋبەكتىلەرىنە 370 ميلليون تەڭگە كولەمىندە ايىپپۇل سالىندى، 2252 مەكەمە ليتسەنزياسىنان ايىرىلدى.

- الايدا كەيبىر كاسىپكەرلەر ليتسەنزيانى باسقا تۇلعالاردىڭ اتىنا راسىمدەپ نەمەسە باسقا مەكەمەنىڭ اتىن جامىلىپ، تاۋلىك بويى الكوگول ساتۋدى جالعاستىرىپ جاتىر، - دەلىنگەن حابارلامادا.

وسى ورايدا كوميسسيا وتىرىسىندا ءبىرقاتار ۇسىنىس ايتىلدى:

- ليتسەنزيا بەرۋگە قويىلاتىن تالاپتاردى كۇشەيتۋ؛

- الكوگول ونىمدەرىن تەك جۇمىس ۋاقىتى شەكتەۋلى ارنايى دۇكەندەردە ساتۋدى قاراستىرۋ.

ايتا كەتەيىك، بۇگىندە ءبىرقاتار ءوڭىر اۋىلدارىندا ىشىمدىكتەن جاپپاي باس تارتۋ ءداستۇرى قالىپتاسىپ كەلەدى. تاياۋدا ۇلىتاۋ وبلىسىندا 15 اۋىل ىشىمدىكتەن باس تارتتى.

ودان بولەك تۇركىستاندا ىشىمدىكسىز ءومىر سالتىن تاڭداعان اۋىلدار قاتارى تولىقتى.