نازاربايەۆ ۋنيۆەرسيتەتىنىڭ بيۋدجەتىن ءبىر ستۋدەنتكە شاققان كەزدە 240 مىڭ دوللار - راحمان الشانوۆ

قازاقستان جوعارى وقۋ ورىندارى قاۋىمداستىعىنىڭ پرەزيدەنتى راحمان الشانوۆ ەلوردادا بۇگىن وتكەن «ۋنيۆەرسيتەتتەردىڭ جاڭا مودەلى» اتتى ۇلتتىق رەكتورلار مەكتەبىنىڭ جيىنىندا الماتى حوستەلىندەگى ءورت تۋرالى پىكىر ءبىلدىردى، دەپ حابارلايدى Kazinform.

«وتكەندە ۇلكەن جينالىستا دا ايتتىم. قاراساڭىز، نازاربايەۆ ۋنيۆەرسيتەتىنىڭ بيۋدجەتىن بۇعان دەيىن ەشكىم بىلگەن جوق. وتكەندە ايتىلىپ قالدى. ءبىر عانا سول ۋنيۆەرسيتەتتىڭ بيۋدجەتى قازاقستانداعى بۇكىل ۋنيۆەرسيتەتتەردىڭ قاراجاتىنان ارتىق بوپ تۇر. ارينە، جوعارى ءبىلىمدى دامىتۋ كەرەك بولدى. ءبىراق قاشانعى وسىلاي بولا بەرەدى؟! بۇگىنگى تاڭدا مەملەكەت ءالى ولارعا بيۋدجەتتەن كومەكتەسىپ وتىر. سوندا كەتكەن اقشانىڭ جارتىسىن ۇنەمدەيتىن بولسا، قالاي بولار ەدى؟ ولاردىڭ ءۋاجى بار، گارۆاردتا قانشاما بالانى وقىتقانشا ءوز ەلىمىزدە سول جاقتىڭ عالىمدارىن شاقىرتىپ وقىتامىز، سول ارقىلى اقشا ۇنەمدەيمىز دەگەندى ايتادى. نازاربايەۆ ۋنيۆەرسيتەتىنىڭ بيۋدجەتىن ءبىر ستۋدەنتكە شاققان كەزدە 240 مىڭ دوللار ەكەن. ال گارۆاردتا 40 مىڭ دوللار عانا. بىزدە 6 ەسە جوعارى. سوندا ءبىز گارۆاردتان 6 ەسە كوپ مامان دايىنداپ جاتىرمىز با؟ اقشانىڭ ءبارى قايدا كەتىپ جاتىر؟ تەكسەرەتىن ورگاندار سونى تەكسەرسىن»، - دەيدى عالىم.

ايتۋىنشا، ءبىر جاتاقحانا سالۋعا 2 ميلليارد تەڭگە كەتەدى.

«نازاربايەۆ ۋنيۆەرسيتەتىنىڭ جىلدىق بيۋدجەتىنىڭ جارتىسىن ۇنەمدەيتىن بولسا، 100 جاتاقحانا سالۋعا بولاتىن ەدى. ال 100 جاتاقحانا دەگەن 5 مىڭ ستۋدەنتتىڭ پاناسى. سوندا كەشەگى حوستەلدەگىدەي وقيعا بولمايتىن ەدى. الماتىدا قازىر 40 مىڭ بالا دالادا ءجۇر. امالسىزدان حوستەلگە بارادى. «كەرەك، كەرەك»، - دەپ سانيتاريالىق نورمانى، تالاپتاردى تومەندەتتىك. سونىڭ سالدارىنان وسىنداي جاعداي بولدى»، - دەدى قاۋىمداستىق پرەزيدەنتى.

اۆتور

ەسىمجان ناقتىباي