نازاربايەۆ ۋنيۆەرسيتەتىن قارجىلاندىرۋ مەحانيزمى وزگەرەدى

استانا. قازاقپارات - 2026 -جىلعى 1-قاڭتاردان باستاپ ءبىلىم بەرۋ، دەنساۋلىق ساقتاۋ جانە قارجى سالاسىنداعى ءبىرقاتار كۆازيمەملەكەتتىك ۇيىمدى قارجىلاندىرۋ مەحانيزمى كۇشەيتىلەدى. بۇل تۋرالى جوعارى اۋديتورلىق پالاتا حابارلايدى.

بيۋدجەت كودەكسىنە قاجەتتى وزگەرىستەر ەنگىزۋ پروتسەسى رەسپۋبليكالىق بيۋدجەتتىڭ شوعىرلاندىرىلعان قارجىلىق ەسەپتىلىگىنە (ش ق ە) جۇرگىزىلگەن مەملەكەتتىك اۋديتتەن كەيىن باستالدى. اۋديتورلار مەملەكەتتىك مەكەمەلەر بولىپ تابىلمايتىن ۇيىمداردى نىسانالى سالىمدار مەن نىسانالى اۋدارىمداردىڭ كومەگىمەن قارجىلاندىرۋ مۇمكىندىگى مەملەكەت اكتيۆتەرىنىڭ شوعىرلاندىرىلعان قارجىلىق ەسەپتىلىگىنە كورسەتىلۋ ساپاسى مەن دۇرىستىعىنا تەرىس اسەر ەتەتىنىن انىقتادى.

- وسىنداي مەحانيزم ارقىلى جىل سايىن «نازاربايەۆ ۋنيۆەرسيتەتى» جانە «نازاربايەۆ زياتكەرلىك مەكتەپتەرى» دەربەس ءبىلىم بەرۋ ۇيىمدارى، الەۋمەتتىك مەديتسينالىق ساقتاندىرۋ قورى، «استانا» حالىقارالىق قارجى ورتالىعى جانە باسقا دا ءبىرقاتار ۇيىم قارجىلاندىرىلادى. جوعارى اۋديتورلىق پالاتا ۇكىمەتكە قارجىلاندىرۋ ءتاسىلىن وزگەرتۋ مۇمكىندىگىن قاراۋدى ۇسىندى، ويتكەنى قولدانىستاعى مەحانيزم مەملەكەت اكتيۆتەرىنىڭ وسۋىنە ىقپال ەتپەيدى (زاڭدى تۇلعالاردىڭ جارعىلىق كاپيتالدارىنىڭ ۇلعايۋى جوق) جانە قاراجاتتى جۇمساۋدىڭ اشىقتىعىن قامتاماسىز ەتپەيدى، - دەلىنگەن حابارلامادا.

اقپاراتتا ايتىلعانداي، جاڭا بيۋدجەت كودەكسىندە نىسانالى سالىمدار مەن اۋدارىمدار كومەگىمەن قارجىلاندىرۋدى كوزدەيتىن نورمالار الىپ تاستالدى. ونىڭ ورنىنا زاڭدى تۇلعالارعا بەرىلەتىن ترانسفەرتتەر ەنگىزىلەدى. ترانسفەرتتەر ولاردى الۋعا ۇمىتكەر ۇيىمدار وزدەرىنىڭ ستراتەگيالىق قۇجاتتارىندا ناقتى ناتيجەلەردى جوسپارلاعان جاعدايدا بولىنەدى.

- زاڭدا كوزدەلگەن جەكەلەگەن جاعدايدى الماعاندا، جىل ىشىندە بولىنگەن جانە پايدالانىلماعان قاراجات بيۋدجەتكە قايتارىلادى. ترانسفەرتتەر الاتىن زاڭدى تۇلعالاردىڭ ءبىرىنشى باسشىلارى مەملەكەتتىك ورگانداردىڭ دامۋ جوسپارلارىندا، وزدەرىنىڭ ۇزاق مەرزىمدى ستراتەگيالارىندا جانە ءتيىستى بيۋدجەتتىك باعدارلامالاردىڭ پاسپورتتارىندا ايقىندالعان ناتيجەلەرگە قول جەتكىزۋگە جاۋاپتى بولادى. سونىمەن قاتار ولار قاراجاتتى پايدالانۋ تۋرالى ەسەپتەردىڭ نەگىزدىلىگى مەن دۇرىستىعىنا جاۋاپ بەرەدى، - دەپ حابارلاپ وتىر جوعارى اۋديتورلىق پالاتا.

اتالعان وزگەرىستەر 2026 -جىلعى 1- قاڭتاردان باستاپ كۇشىنە ەنەدى.

جىل باسىندا جوعارى اۋديتورلىق پالاتانىڭ ءتوراعاسى ءاليحان سمايىلوۆ مەملەكەت باسشىسىنا ەسەپ بەرۋ بارىسىندا بيۋدجەتكە 135 ميلليارد تەڭگە قايتارىلعانىن حابارلاعان ەدى.

اۆتور

داۋلەت ىزتىلەۋ