NASA قۇرىلعىسى تاريحتا تۇڭعىش رەت كۇن اتموسفەراسىنىڭ جوعارعى قاباتىنا جەتتى
بۇل تۋرالى NASA عارىش اگەنتتىگى حابارلادى.
«تاريحتا تۇڭعىش رەت عارىش كەمەسى كۇنگە جاقىندادى. NASA Parker Solar زوندى كۇن اتموسفەراسىنىڭ جوعارعى قاباتتارى - ونىڭ ءتاجى ارقىلى ۇشىپ ءوتىپ، كۇن ەنەرگياسىنىڭ بولشەكتەرى مەن ونىڭ ماگنيت ورىستەرى تۋرالى مالىمەتتەر جينادى. بولاشاقتا قۇرىلعى كۇن تۋرالى كوبىرەك اقپارات جيناۋ ءۇشىن ونىڭ تاجىنەن ءوتۋدى جالعاستىرادى. پاركەر كۇندى اينالىپ ءوتىپ، ماكسيمالدى قاشىقتىق 3,83 ميلليون كيلومەترگە جەتەدى»، - دەدى عارىش اگەنتتىگى.
زوند Delta-IV زىمىرانى ارقىلى 2018-جىلى كۇنگە ۇشىرىلعان. سالماعى 635 كەلى بولاتىن زوندتىڭ ولشەمى 1x 3 مەتر جانە ماگنيت ورىستەرىن، كۇن پلازماسى مەن ەنەرگيا بولشەكتەرىن زەرتتەۋگە ارنالعان ءتۇرلى قۇرىلعىلارمەن، كۇن ءتاجى مەن جەلدى بەينەلەۋگە ارنالعان كامەرالارمەن جابدىقتالعان. پاركەر كۇنگە جاقىنداعان كەزدە جانىپ كەتپەۋ ءۇشىن قالىڭدىعى 11 سانتيمەتر كومىرتەكتى تالشىقتان جاسالعان جانە 1370 گرادۋسقا دەيىنگى تەمپەراتۋراعا توتەپ بەرەتىن قورعانىس پانەلىمەن جابدىقتالعان.
7 جىلدىق ميسسيا بارىسىندا زوند كۇننىڭ جانىنان 24 رەت ۇشىپ وتەدى. ونىڭ نەگىزگى مىندەتتەرىنىڭ قاتارىندا كۇن ءتاجىنىڭ قىزۋ سەبەپتەرىن جانە كۇن جەلىسىنىڭ ۇدەۋىن زەرتتەۋ بولىپ تابىلادى.
ميسسيا بارىسىندا الىنعان دەرەكتەر مەتەورولوگتارعا عارىشتىق اۋا رايىنىڭ جەردەگى تىرشىلىككە اسەر ەتۋى مۇمكىن ەلەۋلى وزگەرىستەرىن دالىرەك بولجاۋعا كومەكتەسەدى.
massaget.kz
