«ناۋرىز» يپوتەكاسىنا ءبىر تاۋلىكتە 1124 ءوتىنىم تۇسكەن

استانا. KAZINFORM - «وتباسى بانكتىڭ» باسپا ءسوز قىزمەتى «ناۋرىز» تۇرعىن ءۇي باعدارلاماسىنىڭ باستالعان العاشقى كۇننىڭ ناتيجەلەرىن جاريا ەتتى.

«العاشقى كۇننىڭ قورىتىندىسى بويىنشا قازاقستاندىقتار باس- اياعى 3347 ءوتىنىم جولدادى. تۇرعىن ءۇيى بارلار مەن دەپوزيتىن قاجەتتى سوماعا، 1 ميلليون تەڭگە تولتىرماعانداردىڭ وتىنىمدەرى كەرى قايتارىلدى. 1124 ءوتىنىم ءساتتى قابىلداندى، ولاردىڭ جارتىسى تۇرعىن ءۇي كەزەگىندە تۇرعان حالىقتىڭ الەۋمەتتىك وسال توپتارىنىڭ وكىلدەرىنەن كەلىپ ءتۇستى»، - دەپ جازىلعان مالىمەتتە.

بانك مالىمەتى بويىنشا، «ناۋرىز» باعدارلاماسىنا قاتىسۋعا نيەت بىلدىرگەن قازاقستاندىقتار اراسىندا 24 پەن 35 جاس ارالىعىنداعى جاس قازاقستاندىقتار كوش باستاپ تۇر.

«تۇرعىن ءۇي ساتىپ الۋ ءۇشىن ەڭ كوپ تاڭدالعان ۇزدىك بەس ايماقتىڭ قاتارىنا الماتى، شىمكەنت، اقتوبە مەن ماڭعىستاۋ وبلىستارىمەن بىرگە استانا دا كىردى.

باسپانا ماركەت پلاتفورماسى (otbasybank.kz) ساعاتىنا ورتا ەسەپپەن 400 ءوتىنىمدى قابىلداپ، وڭدەدى. «ناۋرىز» باعدارلاماسى بويىنشا وتىنىمدەر جۇمىس كۇندەرى ساعات 9.00 دەن 21.00 گە دەيىن قابىلدانادى.

قاتىسۋشىلاردى دۇرلىكتىرمەۋ ءۇشىن وتىنىمدەردى قابىلداۋ مەرزىمى بارىنشا ۇزارتىلدى. ول 25-ساۋىردەن 30-ماۋسىمعا دەيىن، ەكى اي بويى جالعاسادى. سونداي- ق ءوتىنىم بەرۋ كۇنى مەن ۋاقىتى ۇپاي ساناعاندا ەسكەرىلمەيدى.

سوندىقتان بانك سالىمشىلارى اسىقپاي ءوز دەپوزيتتەرىن تولىقتىرىپ، قاجەت بولعان جاعدايدا ونى تۋىستارىنىڭ دەپوزيتتەرىمەن بىرىكتىرىپ، باعدارلامانىڭ شارتتارىمەن مۇقيات تانىسىپ، سودان كەيىن عانا ءوتىنىم بەرۋگە كىرىسە الادى.

وتىنىمدەردى قابىلداۋ مەرزىمى اياقتالعاننان كەيىن سارالاۋ باستالادى. باعدارلاماعا قاتىسۋشىلار تىزىمىنە ەڭ كوپ ۇپاي جيناعان ۇمىتكەرلەر كىرەدى»، - دەپ جازادى «وتباسى بانك» ماماندارى.