ناۋرىز مەيرامىن كەڭىنەن دارىپتەۋىمىز كەرەك - مەملەكەت باسشىسى
استانا. KAZINFORM - ناۋرىز مەيرامىن كەڭىنەن دارىپتەۋىمىز كەرەك. بۇل تۋرالى قازاقستان حالقى اسسامبلەياسىنىڭ سەسسياسىندا مەملەكەت باسشىسى قاسىم-جومارت توقايەۆ ايتتى.
- قازاقستان - تاعدىردىڭ جازۋىمەن شەتتە تۋىپ، شەتتە وسكەن بارشا قازاقتىڭ تاريحي وتانى. شەتەلدەگى قازاقتاردىڭ باسىم كوپشىلىگى انا ءتىلى مەن اتا ءداستۇرىن بەرىك ۇستانىپ كەلەدى. ەل بىرلىگى - ەڭ الدىمەن، كۇللى قازاقتىڭ بىرلىگى. ەكىنشىدەن، ەل بىرلىگى - قاسيەتتى قازاق جەرىن مەكەن ەتكەن بارشا ەتنوستىڭ بىرلىگى. ءبىز بۇل تۋرالى ۇنەمى ايتامىز. كەزىندە قازاقستانعا ميلليونداعان ادام جەر اۋدارىلدى. حالقىمىز ولاردىڭ ەشقايسىسىن جات كورمەي، باۋىرىنا باستى. سول بۋىننان تاراعان ميلليونداعان ادام - قازىر قازاقستاننىڭ تولىققاندى ادال ازاماتتارى. ولار مەملەكەتىمىزدى دامىتۋعا زور ۇلەس قوسىپ، ەل يگىلىگىنە قىزمەت ەتىپ ءجۇر. قازاق جۇرتى ەگەمەندىگىن العان سوڭ قانداستارىمىزدىڭ ەلگە قايتۋىنا جول اشىلدى. قازاقستاننان دا كوپتەگەن ادام ءوزىنىڭ تاريحي اتامەكەنىنە ورالدى، - دەدى قاسىم-جومارت توقايەۆ.
مەملەكەت باسشىسى 4 ميلليونعا جۋىق وتانداسىمىز گەرمانياعا، پولشاعا، يزرايلگە جانە باسقا ەلدەرگە كوشىپ كەتكەنىن ەسكە سالدى.
- ءبىراق ولاردىڭ كوبى قازاق جۇرتىنىڭ جاقسىلىعى مەن قامقورلىعىن ۇمىتپايدى. قازاقستاننىڭ تۋىن تورىنە ءىلىپ، ەلگە دەگەن ساعىنىشىن كورسەتىپ وتىرادى. قازاقشا سويلەپ، قازاقشا ءان ايتىپ، قازاقتىڭ سالت-ءداستۇرىن ۇستانادى. جىل سايىن ناۋرىز مەيرامىن اتاپ وتەدى. بارشا قازاقستان ازاماتتارى، شەتەلدە تۇرىپ جاتقان بارلىق وتانداسىمىز - ءبارى دە ءبىر ۇلكەن وتباسى دەۋگە بولادى. وتباسى قۇندىلىقتارىن نىعايتۋ - تۇراقتى جانە ۇيلەسىمدى قوعامنىڭ نەگىزى، ەلىمىزدىڭ جارقىن بولاشاعىنىڭ كەپىلى. جان-جاقتى دامىعان تۇلعا دا، جاۋاپكەرشىلىگى زور ازامات تا، وتانعا دەگەن سۇيىسپەنشىلىك تە وتباسىندا قالىپتاسادى. ءبىز ەلىمىزدىڭ ءار شاڭىراعى، ءار ازاماتى تويلايتىن مەرەكەگە قۇرمەتپەن قاراپ، كەڭىنەن دارىپتەۋىمىز كەرەك. مىنە، سونداي ناعىز حالىقتىق مەرەكەلەردىڭ ءبىرى، بۇل - ناۋرىز مەيرامى. بيىل جاڭا تۇجىرىمداماعا ساي ءبىز ۇلىستىڭ ۇلى كۇنىن ەرەكشە اتاپ وتتىك. كوكتەمگى كوڭىل-كۇي مەن مىزعىماس بىرلىك مەرەكەسى ەلىمىزدىڭ ءار ايماعىندا تويلاندى. وسىلايشا، ءبىزدىڭ قوعامدا جاسامپاز جاڭا داستۇرلەر قالىپتاسىپ، ورنىعۋدا، - دەدى پرەزيدەنت.
