ناۋرىز بازارى: ەلورداداعى جارمەڭكەگە ەكىنشى كۇنى 42 مىڭ ادام كەلدى
استانا. KAZINFORM - «ناۋرىز بازارى» جارمەڭكەسى جۇمىسىنىڭ ەكىنشى كۇنى ەكسپو حالىقارالىق كورمە ورتالىعىنا 42 مىڭ ادام كەلدى، دەپ حابارلايدى ەلوردا اكىمدىگىنىڭ رەسمي سايتى.
ەستەرىڭىزگە سالا كەتەيىك، قازاقستان استاناسىنا زەرگەرلەر، قىش شەبەرلەرى، كەراميكا، تاس جانە ت. ب. ماماندارى، سول سياقتى كىلەم توقۋ بويىنشا ساراپشىلار، تۇركيا، يران، ازەربايجان، وزبەكستان، تاجىكستان، تۇرىكمەنستان، قىرعىزستان ەلدەرىنەن حالىق مۋزىكالىق اسپاپتارىن جاساۋشىلار جينالدى.
«ناۋرىز بازارى» جارمەڭكەسىنە قاتىسۋشىلار ەتنوستيلدەگى كيىم توپتامالارىنىڭ، زەرگەرلىك بۇيىمداردىڭ، كەراميكا، مەتال، كيىز جانە جىبەكتەن جاسالعان زاتتاردى، كادەسىيلاردى ۇسىندى.
ەلىمىزدىڭ وڭىرلەرىنەن كەلگەن فەرمەرلەر ازىق-تۇلىك جارمەڭكەسىنە 200 توننادان استام ءونىم، ونىڭ ىشىندە ەت جانە ءسۇت ونىمدەرى، كوكونىستەر مەن جەمىستەر، بال جانە ت. ب. اكەلدى.
«ناۋرىز بازارى» اياسىندا شىعىس تاعامدارى فەستيۆالى ءوتىپ جاتىر، وندا استانالىقتار مەن قوناقتار ناۋرىز كوجە، پالاۋ، باۋىرساق جانە باسقا دا ۇلتتىق مەرەكەلىك تاعامداردان ءدام تاتتى.
22-ناۋرىزدا جارمەڭكە بارىسىندا ەلوردا تۇرعىندارى مەن قوناقتارىنا ارناپ 1,7 توننادان استام پالاۋ جانە 500 ليتردەن استام ناۋرىز كوجە دايىندالدى.
جارمەڭكە 23-ناۋرىز كۇنى ساعات 09:00 دەن 18:00 گە دەيىن وتەدى.
