نەگە جەكە بالاباقشالار مەن مەكتەپتەرگە قاتىستى شاعىم كوبەيدى
قىزىلوردا. KAZINFORM - قىزىلوردا وبلىسى بويىنشا مەكتەپكە دەيىنگى 676 ۇيىمدا 50 مىڭنان استام بالا تاربيەلەنىپ جاتىر. وبلىستىق ءبىلىم باسقارماسى جوسپارلى مونيتورينگ قورىتىندىسىن جاريالادى.
باسقارما باسشىسى اسقاربەك ەسجانوۆتىڭ ايتۋىنشا، 464 جەكە بالاباقشانىڭ نەبارى 75 ى تيپتىك جوباداعى، ال قالعانى جەكە جانە جالدامالى عيماراتتاردا، ونىڭ ىشىندە ىڭعايلاستىرىلعان كوتتەدج، جەكە تۇرعىن ءۇي، ەسكى ساۋنا جانە تاعى باسقاسىندا ورنالاسقان. سوڭعى كەزدە جەكەمەنشىك بالاباقشالارداعى قىزمەت ساپاسىنا قاتىستى شاعىم كوبەيدى.
- شيەلى اۋدانىندا «رايانا» بالاباقشاسى تاربيەلەنۋشىسىنىڭ بىرنەشە جەردەن تىستەلۋى، «سىر بولاشاعى» بالاباقشاسىندا ءبۇلدىرشىننىڭ ىستىق سۋعا كۇيىپ قالۋى، «كۇنىم-اي» بالاباقشاسىنىڭ جەكە كولىكپەن بالالاردى بالاباقشاعا تاسىمالداۋى سالدارىنان جول- كولىك وقيعاسى بولىپ، 2 بالانىڭ اۋىر حالدە جانساقتاۋ بولىمىنە ءتۇسۋى قوعامدىق رەزونانس تۋدىردى. جەكە بالاباقشالاردىڭ كوپشىلىگى ءالى كۇنگە بالا تاسىمالداۋدا تالاپتى ساقتامايدى. وتكەن جىلدارى بالانىڭ تاماقتان ۋلانۋ دەرەگى، وقۋ جىلىنىڭ باسىندا قىزىلوردا قالاسىنداعى «نۇر الەمى»، «سىر بەسىگى» بالاباقشالارىندا بالا ۇرۋ، قىزىلوردا قالاسىنداعى «جاس ۇرپاق» ينكليۋزيۆتى بالاباقشاسىندا بالانى كەرۋەتتەن قۇلاتۋ دەرەكتەرى انىقتالدى. وسىنداي وقيعالاردان-اق كەيبىر جەكە بالاباقشالاردىڭ بالالاردىڭ قاۋىپسىزدىگى مەن ومىرىنە نەمقۇرايلى قارايتىنىن كورۋگە بولادى. ال ءبىزدىڭ قوعام مۇنداي جاعدايلاردا ءۇنسىز قالادى نەمەسە جەرگىلىكتى اتقارۋشى ورگاندى كىنالاپ شىعادى، - دەدى اسقاربەك ەسجانوۆ.
مونيتورينگ بارىسىندا انىقتالعان باسقا دا كەمشىلىك جەتىپ جاتىر. ورىن تاپشىلىعى، اسحانانىڭ تالاپقا ساي ەمەستىگى، ازىق-تۇلىك، ءدارى-دارمەك قورىنىڭ جەتىسپەۋى، سانيتارلىق تالاپتىڭ ساقتالماۋى، تاعىسىن تاعى.
ەكى جىل بۇرىن بارلىق بالاباقشادا Face-ID موبيلدى قوسىمشاسى پايدا بولدى. باسقارما باسشىسى وسى ارقىلى 2023-2025 -جىلدارى جەكە بالاباقشا يەلەرى «ۇرلاپ كەلگەن» 14 ميلليارد تەڭگە قارجى ۇنەمدەلگەنىن اتاپ ءوتتى. وسى كۇنى ەڭبەككە جارامسىزدىق پاراعىن بازادان كورۋگە مۇمكىندىك تۋدى. سونىڭ ارقاسىندا جالعان انىقتاما جاساۋشىلاردىڭ جولى كەسىلدى.
- كەمشىلىكتەر انىقتالعان، ونى قالپىنا كەلتىرمەگەن نەمەسە قالپىنا كەلتىرگەنى جونىندە مالىمەت ۇسىنباعان 42 بالاباقشانىڭ مەملەكەتتىك تاپسىرىسى توقتادى. قىزىلوردا قالاسىندا 44، جاڭاقورعان اۋدانىندا 24، شيەلى اۋدانى بويىنشا 26 ۇيىم مەملەكەتتىك تاپسىرىس الۋشىلار تىزبەسىنەن شىعارىلدى. وسىدان 5 جىل بۇرىن بالاباقشالارعا مەملەكەتتىك تاپسىرىس كولەمى ورتاشا ەسەپپەن 24240 تەڭگە بولسا، 2025 -جىلى 73 مىڭ تەڭگەگە دەيىن، ياعني 3 ەسە ءوستى. قارجىلاندىرۋ كولەمى ۇلعايعانىمەن بالاباقشالاردىڭ جاي-كۇيى وزگەرگەن جوق، جاۋاپكەرشىلىك ارتقان جوق. مەملەكەتتەن قاجەتتى قارجىلىق قولداۋدى الادى، وعان قوسا اتا-انا تولەماقىسىن الادى. ال بالالارعا بارىنشا جاعداي جاساۋعا كەلگەندە قۇلىقسىز. مۇنداي پىسىقايلارعا كوز جۇمىپ قاراي المايتىنىمىزدى قاتاڭ تۇردە ەسكەرتەمىز، - دەدى باسقارما باسشىسى.
اسقاربەك ەسجانوۆ اتاپ وتكەندەي، كەيبىر جەكە بالاباقشا جالاقىنى ءالى كۇنگە قولما-قول بەرەدى. سوندىقتان بەكىتىلگەن قارجىدان كەم تولەنەتىن جاعدايلار كەزدەسەدى. قىزمەتكەر ايتايىن دەسە، «جەپ وتىرعان نانىم عوي» دەپ ءتىلىن تىستەۋگە ءماجبۇر.
- جەكە بالاباقشا قۇرىلتايشىلارىنا وسى ءۇشىن زاڭعا سايكەس جاۋاپكەرشىلىك كوزدەلگەنىن ەسكەرتكىم كەلەدى. بۇدان بولەك، جاقىندا عانا ءبىر توپ اتا-انا وبلىس اكىمدىگىنە كەلىپ، جەكە بالاباقشالاردىڭ اتا-انالار تولەمىن ارتتىرىپ جاتقانىنا شاعىمداندى. مۇنداي زاڭبۇزۋشىلىققا بارعان بالاباقشالار مەملەكەتتىك تاپسىرىستان قاعىلادى، - دەدى ول.
وڭىردە جەكە مەكتەپتەردىڭ دە جايى ءماز ەمەس. 39 جەكە مەكتەپتە 15 مىڭنان استام بالا وقىپ ءجۇر.
- ونىڭ 29 ى نەمەسە %74,3 ىندا پەداگوگتەردىڭ ساپالىق قۇرامى ليتسەنزيا تالاپتارىنا سايكەس كەلمەيدى. ءبىرشاما ۋاقىت بۇرىن «جەكە مەكتەپتەردەگى مۇعالىمدەر جالاقىسىن الا الماي ءجۇر، ءبىلىم باسقارماسى اقشانى اۋدارماي وتىر» دەگەن ەش شىندىققا جاناسپايتىن مالىمەت تارادى. جەكە مەكتەپتەردى قارجىلاندىرۋ بيىلدان باستاپ جەرگىلىكتى اكىمدىكتەرگە جۇكتەلدى. ءبىز ءوز مىندەتتەمەمىزدى تولىق ورىنداپ، قاڭتار، اقپان، ناۋرىز، ءساۋىر، مامىر ايلارىنا جوسپارلانعان 8,2 ميلليارد تەڭگە قارجىنى ءبىرىڭعاي وپەراتور - قارجى ورتالىعىنا تولىق اۋداردىق. قارجىنى ۋاقىتىلى الا الماعان جاعدايدا «مۇعالىم مەن وقۋشى وسى وبلىستىكى عوي، نەگە شەشپەيسىزدەر» دەپ ۇرانداتاتىن كەيبىر كاسىپكەر سول وقۋشىلارعا جاسالىپ جاتقان جاعدايدى تەكسەرەردە «جۇمىسىمىزعا كەدەرگى كەلتىردى» دەپ شۋ شىعارادى، - دەدى وبلىستىق ءبىلىم باسقارماسىنىڭ باسشىسى.
باقىلاۋ بوساڭسىپ كەتىپ ەدى، جاعا ۇستاتارلىق جاعدايلار جيىلەدى. بيىل 27-اقپاندا «بايتەرەك school» جەكە مەكتەبىندە بالالار ۋلاندى. 3 مامىر كۇنى ر. ءاليارىستان ۇلى اتىنداعى جەكە مەكتەپ وقۋشىسى سۋعا كەتىپ، قازا بولدى.
جەكەمەنشىك مەكتەپتەردىڭ بارلىعى قالا، كەنتتەردە ورنالاسقان.
- وقۋشى تارتۋ ءۇشىن جاڭاقورعان جانە شيەلى اۋداندارىنداعى مەكتەپ قۇرىلتايشىلارى شالعايداعى اۋىلداردان بالا تاسىمالداۋدى جولعا قويعان. بۇل اۋداندارداعى ەلدى مەكەندەردىڭ باسىم بولىگى رەسپۋبليكالىق ماڭىزى بار ۇلكەن تراسسا بويىندا ورنالاسقان. ال ولاردى تاسىمالداناتىن بالالاردىڭ جول قاۋىپسىزدىگى ماسەلەسى مۇلدەم مازالامايدى. ماقساتى - تەك پايدا تابۋ. ەرتەڭگى كۇنى وسىنداي تاسىمال كەسىرىنەن وقىس وقيعا بولسا، قوعام اينالىپ كەلىپ ءبىلىم باسقارماسىن كىنالايدى. ءبىز ورتالىق اتقارۋشى ورگاندارعا وسى جانە باسقا دا ماسەلەلەر بويىنشا ۇسىنىستار ازىرلەدىك. الداعى ۋاقىتتا بۇل باعىتتاعى جۇمىستى كۇشەيتەمىز. ءبىزدىڭ باستى ماقساتىمىز - بالالاردىڭ ءومىرى مەن قاۋىپسىزدىگىن قامتاماسىز ەتۋ. ساپالى ءبىلىم، سانالى تاربيە بەرۋ، - دەدى اسقاربەك ەسجانوۆ.
اۆتور
نازەركە سانيازوۆا
