چەمپيوندار ليگاسى: «قايرات» ءبىرىنشى كەزەڭنەن كەيىن «رەال مادريدتەن» جەڭىلىپ جاتىر
استانا. KAZINFORM - UEFA چەمپيوندار ليگاسى نەگىزگى كەزەڭى ەكىنشى تۋرىنداعى قازاقستاندىق «قايرات» (الماتى) جانە يسپانيانىڭ «رەال مادريد» (يسپانيا) كەزدەسۋىنىڭ ءبىرىنشى كەزەڭى اياقتالدى.
العاشقى مينۋتتا الماتىلىق كلۋب العا قاراي ۇمتىلدى. وسىنداي ءساتتىڭ بىرىندە شابۋىلشى داستان ساتپايەۆتىڭ باسپەن ۇرعان دوبى مادريدتىك كلۋب قاقپاشىسى تيبو كۋرتۋانىڭ قولىنان تابىلدى. الماتىلىق كلۋب ودان كەيىن دە «رەال مادريد» قاقپاسى ماڭىنان جيى بوي كورسەتتى. دەگەنمەن دىتتەگەن ماقساتىنا جەتە العان جوق.
يسپانيالىق كلۋب ويىن بارىسىندا تىزگىندى قولعا الۋعا تىرىستى. وسىنداي ساتتەردىڭ بىرىندە «قايرات» ويىنشىلارى ءوز ايىپ الاڭىندا ءتارتىپ بۇزدى. ويىننىڭ 26-مينۋتىندا كيليان مباپپە الماتىلىق كلۋب قاقپاسىنا بەلگىلەنگەن پەنالتيدەن ءمۇلت كەتكەن جوق.
وسىلايشا ءبىرىنشى كەزەڭ 1:0 ەسەبىمەن «رەال مادريدتىڭ» باسىمدىعىمەن اياقتالدى.
قازىرگە دەيىن الماتىلىق كلۋب ءبىرىنشى تۋردا پورتۋگاليانىڭ «سپورتينگ» (ليسسابون) كومانداسىنا 1:4 ەسەبىمەن ەسە جىبەردى. ەندى ولار بەدەلدى تۋرنيردە «رەال مادريد» (يسپانيا)، «ينتەر» (يتاليا)، «ارسەنال» (انگليا)، «بريۋگگە» (بەلگيا)، «وليمپياكوس» (گرەكيا)، «پافوس» (كيپر)، «كوپەنگاگەن» (دانيا) كلۋبتارىمەن وينايدى.
ەلىمىزدىڭ اتىنان تۋرنيردە الماتىلىق «قايرات» سىنعا ءتۇسىپ جاتىر. قازاقستاندىق كوماندا دوپ دوداسىندا بارلىعى 8 ويىن وتكىزەدى. ونىڭ 4 ەۋى ءوز الاڭىندا بولسا، 4 ەۋى سىرت الاڭعا جوسپارلانعان.
