مىسىردا مەرت بولعان قازاقستان ازاماتىنىڭ مۇردەسى ەلگە جەتكىزىلەدى
استانا. KAZINFORM - مىسىردا مەرت بولعان وتانداسىمىز اقمارال مۇقانوۆا مەن ونىڭ ۇلى ساقتاندىرىلعان.
Nomad Insurance ساقتاندىرۋ كومپانياسى تۋريستىك وپەراتوردان قايعىلى وقيعا جايلى اقپارات تۇسكەننەن كەيىن بىردەن مۇردەنى ەلگە جەتكىزۋ شىعىندارىن جابۋ ءۇشىن كەپىل بەرىلگەن قاراجاتتى اۋدارعان. قۇزىرەتتى ورگانداردىڭ شەشىمىنە بايلانىستى مۇردە شارم-ەش-شەيحتان نە كايردەن جەتكىزۋ جوسپارلانىپ وتىر.
18-مامىردا شارم-ەش-شەيح اۋەجايىندا رەيستى كۇتىپ تۇرعان جولاۋشىلار تۇرعان اۋماقتا جارناما تاقتاسى قۇلادى. وقيعانىڭ سالدارىنان قازاقستاندىق ايەل مەرت بولدى، تاعى ەكى وتانداسىمىز جاراقات الدى.
وقيعا تۋرالى اقپارات بىردەن پروكۋراتۋرا ورگاندارىنا جولداندى. رەسمي تۇردە قىلمىستىق تەرگەۋ باستالدى. اۋەجاي اكىمشىلىگى مەن جارناما اگەنتتىگىنىڭ وكىلدەرى جان-جاقتى جانە اشىق تەرگەۋ ءجۇرۋى ءۇشىن قۇقىق قورعاۋ ورگاندارىمەن ىنتىماقتاسا ىسكە اتسالىسىپ جاتىر.
ال كەشە اقمارال مۇقانوۆانىڭ جان قۇربىسى ۆەنەرا يسكاكوۆا مارقۇمنىڭ مۇردەسىن ەلگە، اقتوبە قالاسىنا جەتكىزۋ ءۇشىن كومەك سۇراعان ەدى.
