مىسىردا ەجەلگى كوپت موناستىرىنىڭ بولمەلەرى تابىلدى
استانا. KAZINFORM - مىسىردىڭ سولتۇستىگىندەگى بەحەيرا پروۆينتسياسىنداعى ءال-كالايا ارحەولوگيالىق نىسانىندا جەرگىلىكتى ارحەولوگتار عالىمداردىڭ بولجامىنشا ءبىزدىڭ ءداۋىرىمىزدىڭ V عاسىرىنا جاتاتىن كوپت موناستىر كەشەنىنىڭ بولمەلەرىن تاپتى.
بۇل تۋرالى Daily News Egypt باسىلىمى حابارلادى.
تابىلعان عيمارات 13 بولمەدەن تۇرادى. ولاردىڭ قاتارىندا موناحتاردىىڭ جەكە بولمەلەرى، ورتاق تۇرعىن ايماقتار جانە وقۋ بولمەلەرى بار. عيماراتتىڭ سولتۇستىك بولىگىندە تاستان اسەمدەلگەن ورىندىقتارى بار كەڭ زال ورنالاسقان. زەرتتەۋشىلەردىڭ پىكىرىنشە، بۇل ورىن قوناقتاردى قابىلداۋ ءۇشىن پايدالانىلعان بولۋى مۇمكىن. عيماراتتىڭ ورتاسىندا ارنايى قۇلشىلىق ەتۋگە ارنالعان ايماق انىقتالعان، مۇندا قابىرعادا اكتاس ماتەريالىنان جاسالعان كرەست ساقتالعان.
مىسىردىڭ جوعارى كونە جادىگەرلەر كەڭەسىنىڭ باس حاتشىسى دوكتور حيشام ەل- لەيتي بۇل ولجا ەجەلگى موناستىر ساۋلەتى مەن سول كەزەڭدەگى تۇرمىس-تىرشىلىك تۋرالى ماڭىزدى مالىمەتتەر بەرەتىنىن اتاپ ءوتتى.
ارحەولوگتار سونىمەن قاتار ەجەلگى كوپت بەينەلەۋ ونەرىنىڭ ىزدەرىن دە انىقتادى. اتاپ ايتقاندا، موناحتاردىڭ بەينەسى سالىنعان قابىرعا سۋرەتتەرى جانە وسىمدىك ورنەكتەرىمەن كومكەرىلگەن ەكى قاراقۇيرىق بەينەلەنگەن فرەسكا تابىلعان.
ەكسپەديتسيا جەتەكشىسى سامير ريزك ابدەل حافەزدىڭ ايتۋىنشا، قازبا جۇمىستارى بارىسىندا بيىكتىگى ەكى مەترلىك ءمارمار باعانا، باعانالاردىڭ كاپيتەلدەرى مەن تۇعىرلارى، قىش ىدىستار جانە كوپتەگەن وستراكوندار تابىلعان. وستراكوندار - ەجەلگى داۋىردە جازۋعا پايدالانىلعان كەراميكا سىنىقتارى. ولاردىڭ كەيبىرىنە كوپت ارىپتەرى جازىلسا، كەيبىرى گەومەتريالىق جانە گۇلدى ورنەكتەرمەن بەزەندىرىلگەن.
ەڭ نازار اۋدارارلىق ولجالاردىڭ ءبىرى - كوپت جازۋى قاشالعان تىكبۇرىشتى اكتاس تاقتا. عالىمداردىڭ پايىمىنشا، بۇل جەرلەۋ ستەلاسى بولۋى مۇمكىن.
قازبا ورنىنان سونداي-اق جانۋارلار مەن قۇستاردىڭ سۇيەكتەرى، تەڭىز قابىرشاقتارىنىڭ سىنىقتارى تابىلدى. بۇل موناحتاردىڭ تاماقتانۋ راتسيونى تۋرالى مالىمەت بەرەدى.
ءال- كالايا ەجەلگى موناستىر كەشەنى حريستيان موناستىر تاريحىنداعى كولەمى جاعىنان ەكىنشى ءىرى كەشەن سانالادى. بۇل اۋماقتا قازبا جۇمىستارى 2023-جىلدان بەرى جۇرگىزىلىپ كەلەدى.
ايتا كەتەيىك، ناۋرىز ايىنىڭ باسىندا ارحەولوگتەر مىسىردا ەجەلگى پاتشالىق داۋىرىنە تيەسىلى قابىرلەردى تاپتى.
