مىرزاعالي ايتجانوۆتى قۇرباندىققا شالدىق: باس باپكەردى قورعاۋشىلار سانى كوبەيىپ جاتىر
استانا. قازاقپارات - كەشە بوكستان قازاقستان قۇراماسىنىڭ باس باپكەرى مىرزاعالي ايتجانوۆ پەن قۇرامانىڭ تاعى توعىز باپكەرى جۇمىستان شەتتەتىلگەن بولاتىن. بۇل جاعداي پاريج وليمپياداسىمەن تىكەلەي بايلانىستى بولىپ وتىر.
سەبەبى وليمپيادا كەزىندە كوپشىلىك قازاق بوكسىنىڭ قۇردىمعا كەتكەنىن، فەدەراتسيا باسىنا قارا بۇلت ۇيىرىلگەنىن، وعان تىكەلەي باس باپكەر مىرزاعالي ايتجانوۆ كىنالى ەكەنىن ايتىپ جاتتى. «ايتجانوۆ ءوز امبيتسياسىنىڭ قۇربانى. باس باپكەردىڭ ءوز جۇمىسىن كورسەتۋى ءۇشىن وتە كوپ ۋاقىت پەن مۇمكىندىك بەرىلدى. ءبىراق ناتيجە شىعارا المادى» دەگەن ەدى.
ەندى جەلى قولدانۋشىلارى باس باپكەردىڭ جۇمىستان قۋىلۋىنا نارازىلىق ءبىلدىرىپ، ونى قورعاپ جاتىر.
«پايدالانىپ-پايدالانىپ، لاقتىرا سالدىق. فەدەراتسيا مىرزاعالي ايتجانوۆتى قۇرباندىققا شالدى. اقىلداسۋ، سۇراۋ، پىكىرىن ءبىلۋ جوق. بۋللينگتىڭ كوكەسى سۇمدىق. بوكستاعى بىلىققا تەك باپكەردى كىنالاۋ دۇرىس ەمەس. وسى سالانى قارجىلاندىرىپ، باسقارىپ وتىرعاندار بار ەمەس پە؟ سولاردى جاۋاپقا تارتۋ كەرەك. پاريج وليمپياداسىنان كەيىن ءبىر قورىتىندى جيىن بولمادى. تاراپتاردىڭ ءۋاجى تىڭدالمادى. قوشتاسقاننىڭ وزىندە بۇگىنگە دەيىن جاساعان ەڭبەگىن ەلەپ-ەسكەرىپ، ارقاسىنا شاپان جاۋىپ، قازاقتىڭ ءجون-جورالعىسىمەن شىعارىپ سالۋعا بولماس پا ەدى؟ سىرتىنان بۇيرىق شىعارىپ، ينستاگرام ارقىلى الىپ تاسايمىز. ونى ول ۇيىندە جاتىپ بىلەدى. بۇدان كەيىن ءبىزدى كىم سىيلايدى؟ كورشى ەلدەرگە كۇلكى بولىپ جاتىرمىز. سىرتىنان شەشىم شىعارۋ دۇرىس ەمەس. ءبارىن جيناپ، سىپايى تۇردە، ادەمى شىعارىپ سالۋعا بولاتىن ەدى عوي» - دەيدى اشۋلانعان وقىرمان.
