مينيسترلىك كيىك ەتىنىڭ باعاسىن ۇسىندى

استانا. KAZINFORM - اۋىل شارۋاشىلىعى مينيسترلىگى كيىك ەتىنىڭ باعاسىن جاريالادى.

ۆەدومستۆونىڭ باسپا ءسوز قىزمەتىنىڭ مالىمەتىنشە، كيىك ەتىنىڭ ۇسىنىلاتىن قۇنى - ءبىر كيلوگرامىنا 1600 تەڭگە.

بۇعان دەيىن اۋىل شارۋاشىلىعى ءمينيسترى ايداربەك ساپاروۆ كيىك ەتىنىڭ ناقتى باعاسى 10 كۇن ىشىندە انىقتالاتىنىن حابارلاعان ەدى.

- جۇمىس ەندى عانا باستالدى، بۇل ىسپەن ەكولوگيا جانە تابيعي رەسۋرستار مينيسترلىگى اينالىسىپ جاتىر. ءبىزدىڭ مىندەت - ەت كومبيناتتارىن قامتاماسىز ەتۋ. قازىر 18 كاسىپورىن تىركەلگەن، ولاردا ۆەتەرينارلىق ماماندار دا جۇمىس ىستەيدى. باعا، لوگيستيكا جانە ساتۋ فورماتىنا بايلانىستى ودان ارعى پروتسەسس انىقتالادى. ءبىر اپتا ىشىندە، ءارى كەتسە 10 كۇندە ناقتى مالىمەت بەرەمىز، - دەدى ول ۇكىمەت وتىرىسىنان كەيىن وتكەن باسپا ءسوز ءماسليحاتىندا.

سونداي-اق ەلىمىزدە كيىكتەردىڭ سانىن رەتتەۋ تۋرالى شەشىم قابىلدانعانى بەلگىلى. 2025-جىلعى ەسەپكە سايكەس، اتالعان جانۋارلاردىڭ پوپۋلياتسياسى 3,9 ميلليون باسقا جەتىپ، 1974-جىلعى تاريحي ماكسيمۋمنان (1,2 ميلليون) ءۇش ەسە ارتقان. تەك باتىس قازاقستان وبلىسىنىڭ وزىندە 2,3 ميلليوننان استام كيىك بار.

ەكولوگيا جانە تابيعي رەسۋرستار ءمينيسترى ەرلان نىسانبايەۆتىڭ ايتۋىنشا، كيىكتەردىڭ سانىن رەتتەۋ تۋرالى شەشىم عىلىم جانە جوعارى ءبىلىم مينيسترلىگىنە قاراستى زوولوگيا ينستيتۋتىنىڭ عالىمدارى دايىنداعان بيولوگيالىق نەگىزدەمە مەن اۋستراليا، فينليانديا، كانادا، ا ق ش جانە و ا ر- دىڭ جابايى جانۋارلار پوپۋلياتسياسىن تۇراقتى باسقارۋ سالاسىنداعى حالىقارالىق تاجىريبەسىنە سۇيەنە وتىرىپ قابىلداندى.

ايتا كەتەيىك، اۋىل شارۋاشىلىعى ءمينيسترى ايداربەك ساپاروۆ كيىك ەتىنىڭ باعاسىنا قاتىستى بۇعان دەيىن دە تۇسىنىك بەرگەن ەدى.

بۇعان دەيىن حابارلاعانىمىزداي، باتىس قازاقستاندىق عالىمدار كيىك ەتىنەن شۇجىق جاساپ شىعاردى.

سونداي-اق ەل اۋماعىندا كىمدەرگە كيىك اۋلاۋعا رۇقسات بەرىلەتىنى تۋرالى جازعان ەدىك.