مينيستر سپورت باسقارماسى باسشىلارىن جاپپاي اۋىستىرۋ سەبەبىن ءتۇسىندىردى
استانا. KAZINFORM - تۋريزم جانە سپورت ءمينيسترى ەربول مىرزابوسىنوۆ بىرنەشە وڭىردەگى سپورت جانە دەنە شىنىقتىرۋ باسقارمالارىنداعى كادرلىق اۋىس- تۇيىسكە قاتىستى تۇسىنىك بەردى.
«كەشە ەكى وڭىردە سپورت باسقارماسى باسشىلارى تاعايىندالدى. بەلگىلى سپورتشى سەرىك ساپيەۆ قاراعاندى وبلىسىنىڭ سپورت باسقارماسىنىڭ باسشىسى بولدى. وڭىردەگى سپورتتى دامىتۋعا بارا جاتىر. ەكىنشى پاۆلودار وبلىسى سپورت باسقارماسىنىڭ باسشىسى بولىپ ازامات يماشيەۆ كونكۋرستان ءوتىپ، كوميسسيانىڭ شەشىمىمەن ىرىكتەلىپ الىنىپ تاعايىندالدى. قازىر بىرنەشە وبلىستا كوميسسيا وتىرىستارى ءوتتى. ول جەردە بىلىكتى، سالانى بىلەتىن، مەنەدجەرلىك قابىلەتتەرى بار ماماندار تاعايىندالادى»، - دەدى ەربول مىرزابوسىنوۆ ءماجىلىس وتىرىسى الدىندا اگەنتتىك ءتىلشىسىنىڭ ساۋالىنا جاۋاپ بەرە تۇرىپ.
سونداي- اق، مينيستر سپورت سالاسىنداعى اۋقىمدى كادرلىق اۋىس- ءتۇيىستىڭ سەبەبىن ءتۇسىندىردى.
«سوڭعى ازيا ويىندارى، وليمپيادا ويىندارى جانە وڭىرلەردەگى رەزەرۆ ماسەلەسى بار. بۇگىندە مينيسترلىك تاراپىنان ارنايى مونيتورينگ توبى قۇرىلدى. سول توپ تالداۋ جاساپ، ول جەردە 3-4 جىل وتىرعان، كەيىن ينديكاتور ورىندالماعاننان كەيىن ءبىز وسىنداي شەشىمگە كەلدىك»، - دەيدى ول.
ايتا كەتسەك، ازامات يماشيەۆ پاۆلودار وبلىسىنىڭ دەنە شىنىقتىرۋ جانە سپورت باسقارماسىنىڭ باسشىسى بولىپ تاعايىندالدى.
ودان بولەك، لوندون وليمپياداسىنىڭ چەمپيونى سەرىك ساپيەۆ قاراعاندى وبلىستىق دەنە شىنىقتىرۋ جانە سپورت باسقارماسىنىڭ باسشىسى بولاتىنى ايتىلدى.
