مينيستر ستانيسلاۆ چەرچەسوۆتىڭ ورىنسىز ازىلىنە قاتىستى پىكىر ءبىلدىردى

استانا. KAZINFORM - قازاقستان ۇلتتىق قۇراماسىنىڭ باس باپكەرى ستانيسلاۆ چەرچەسوۆتىڭ قازاق ءتىلىن كەمسىتۋگە تىرىسقانى تۋرالى بەينەماتەريال كەڭىنەن تارالىپ، قوعام تاراپىنان نارازىلىق تۋعىزعان بولاتىن. تۋريزم جانە سپورت ءمينيسترى ەربول مىرزابوسىنوۆ وسى جايتقا قاتىستى پىكىر ءبىلدىردى.

مينيستر باس باپكەردىڭ مىندەتى ۇلتتىق قۇرامانى جاڭا دەڭگەيگە شىعارۋ ەكەنىن اتاپ ءوتتى. سونىمەن قاتار ول ماسەلەنى ارى قاراي ورشىتپەي، كەشىرىمدى بولۋعا شاقىردى.

«قۇرمەتتى دوستار! ارينە، ستانيسلاۆ چەرچەسوۆتىڭ «فرانسۋز تىلىنە» قاتىستى قالجىڭى ورىنسىز بولدى. مۇنى قازاقستان فۋتبول فەدەراتسياسى دا، باپكەردىڭ ءوزى دە بەك تۇسىنەدى. دەگەنمەن چەرچەسوۆتىڭ باستى مىندەتى - ۇلتتىق قۇرامانى جاڭا دەڭگەيگە شىعارۋ. ەندەشە، وعان ەڭ الدىمەن كاسىبي قىزمەتىنە قاراپ باعا بەرۋگە شاقىرامىن. ءبىز قاشاننان قوناقجاي، دارحان مىنەزدى، كەشىرىمدى ەلمىز. ءبىزدى مىقتى ەل ەتەتىن دە وسى قاسيەتتەر. سوندىقتان ماسەلەنى ودان ءارى ورشىتە بەرمەي، حالقىمىزعا ءتان كەڭپەيىلدىك تانىتقانىمىز ابزال. كەز كەلگەن داۋلى ماسەلەنى اقىل-پاراساتپەن شەشەتىن تولەرانتتى، وركەنيەتتى، ياعني دانا قوعام ەكەنىمىزدى كورسەتە بىلەيىك. ستانيسلاۆ چەرچەسوۆ - حالىقارالىق دەڭگەيدەگى تانىمال فۋتبوليست ءارى 20 جىلدىق تاجىريبەسى بار كاسىبي جاتتىقتىرۋشى. سوندىقتان ول تۇبىندە قازاقستاندىق جانكۇيەرلەردىڭ سەنىمىن اقتاپ، ۇلتتىق قۇرامانى قازىرگى كۇردەلى كەزەڭنەن ابىرويمەن الىپ شىعادى دەپ سەنەمىن. ءبارىمىز مۇددەسى ورتاق فۋتبول جاناشىرلارى رەتىندە ءبىر-ءبىرىمىزدى قولداپ جۇرەيىك!»، - دەپ جازدى مينيستر الەۋمەتتىك جەلىدەگى پاراقشاسىندا.

ايتا كەتەيىك، ق ر تۋريزم جانە سپورت مينيسترلىگى ستانيسلاۆ چەرچەسوۆتىڭ ازىلىنە قاتىستى قازاقستان فۋتبول فەدەراتسياسىنا رەسمي حات جولداپ، باس باپكەردىڭ ارەكەتىنە قاتىستى فۋتبول فەدەراتسياسىنان تۇسىنىكتەمە بەرۋدى تالاپ ەتكەن بولاتىن.

فۋتبول فەدەراتسياسى تۇسىنىكتەمە بەردى.

ستانيسلاۆ چەرچەسوۆ ايىپپۇل تولەيتىن بولدى.