مينيستر سۋپەركومپيۋتەر قۇرۋ جونىندە: بيىل جابدىقتار جەتكىزىلەدى

استانا. KAZINFORM - قازاقستان قۋاتى كۇشتى سۋپەركومپيۋتەر قۇرۋعا قاجەت جابدىقتار تاياۋ ارادا جەتكىزىلەدى. بۇل تۋرالى سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ ءمالىم ەتتى.

بۇگىن پارلامەنت ماجىلىسىندە تىلشىلەر قازاقستانداعى سۋپەركومپيۋتەرگە جابدىقتاردى (چيپتەردى) ا ق ش- تان جەتكىزۋ پروتسەسىنە قاتىستى سۇراق قويدى.

- الەمدەگى ۇلكەن سۋپەركومپيۋتەردىڭ ءبىرىن قۇرۋ ءۇشىن كەلىسسوز پروتسەسىنەن وتتىك. قاجەت رۇقساتتاردى الدىق. ەندى وسى جىلى كومپيۋتەردى اكەلۋگە تىرىسامىز. اتاپ ايتقاندا، بيىلدىڭ ءبىرىنشى جارتىسىندا الىپ كەلمەكپىز، - دەدى ج. ماديەۆ.

بۇعان دەيىن قازاقستان قۋاتى كۇشتى سۋپەركومپيۋتەر قۇرۋعا كىرىسكەنىن جازعان ەدىك.

ەسكە سالساق، بىلتىر كۇزدە مينيسترلىك سۋپەركومپيۋتەر ءۇشىن جابدىققا امەريكا قۇراما شتاتتارىنا الدىن الا تاپسىرىس بەرگەنىن مالىمدەدى.

دەگەنمەن، قازاقستانعا جابدىقتى جەتكىزۋ مەرزىمى ا ق ش ۇكىمەتىنىڭ قازاقستان رەسپۋبليكاسىنا چيپتەردى ەكسپورتتاۋ تۋرالى قورىتىندىسىن شىعارۋىنا بايلانىستى. امەريكالىق تاراپ ەكسپورت ليتسەنزياسىن الۋ پروتسەسى ۇزاققا سوزىلاتىنىن حابارلادى.

ەكسپورتتىق ليتسەنزيا الۋ پروتسەسى ا ق ش ۇكىمەتتىك ورگاندارىندا بەلگىلەنگەن تارتىپپەن جۇزەگە اسىرىلادى.

سۋپەركومپيۋتەردى قۇرۋ جۇمىستارى ەكسپورتتىق ليتسەنزيا الىنعاننان كەيىن جانە قاجەت جابدىق ەل اۋماعىنا جەتكىزىلگەن سوڭ اياقتالادى.