مينيستر قازاقستان ساۋدالايتىن 9 نەگىزگى تاۋاردى اتادى

استانا. KAZINFORM - جارتى جىلدا تاۋار اينالىمى 31 تريلليون تەڭگەدەن استى. ساۋدا جانە ينتەگراتسيا ءمينيسترى ارمان شاققاليەۆ ءبىرىنشى جارتىجىلدىقتاعى ساۋدا سالاسىنداعى ناتيجەلەردى باياندادى.

- 2025-جىلدىڭ ءبىرىنشى جارتىجىلدىعىندا ساۋدا كولەمى 8,4 پايىزعا ءوستى، ال تاۋار اينالىمى 31,4 تريلليون تەڭگەنى قۇرادى. ونىڭ ىشىندە كوتەرمە ساۋدا 9,2 پايىزعا ءوستى (21,2 تريلليون تەڭگە)، بولشەك ساۋدا 6,6 پايىزدى قۇرادى (10,2 تريلليون تەڭگە)، - دەدى ا. شاققاليەۆ ۇكىمەتتىڭ بۇگىنگى وتىرىسىندا.

ساۋدانىڭ ءوسۋى كوتەرمە ساۋداداعى 45 پايىز اساتىن نەگىزگى 9 تاۋار ەسەبىنەن قامتاماسىز ەتىلدى. بۇل مۇناي جانە مۇناي ونىمدەرى، گاز، تۇرمىستىق تەحنيكا، ۇيالى تەلەفوندار، فارماتسيەۆتيكا، ماشينا جاساۋ ونىمدەرى، استىق جانە تەمەكى.

بۇل تاۋارلار بويىنشا جىل سوڭىنا دەيىنگى بولجامدى ساتۋ كولەمى 26,4 تريلليون تەڭگە بولۋى كەرەك، ونى ەڭ الدىمەن ىشكى ءوندىرىستى ءوسىرۋ ەسەبىنەن قامتاماسىز ەتۋ قاجەت.

- 6 ايدىڭ قورىتىندىسى بويىنشا بارلىق وڭىرلەر ءوسۋدى كورسەتىپ وتىر. ەڭ ۇلكەن ۇلەستى قامتاماسىز ەتكەن 5 وڭىرگە بارلىق تاۋار اينالىمىنىڭ 72 پايىز قۇرايدى. بۇل الماتى، استانا، شىمكەنت قالالارى، اتىراۋ جانە قاراعاندى وبلىستارى. ءوسۋ قارقىنى بويىنشا كوشباسشىلار - تۇركىستان (69,3 پايىز)، اقمولا (45,4 پايىز) جانە پاۆلودار وبلىستارى (22,3 پايىز)، - دەدى ساۋدا ءمينيسترى.

ايتا كەتەيىك، بۇگىن ۇكىمەتتە بيىلعى قاڭتار- ماۋسىم ايلارىنداعى الەۋمەتتىك-ەكونوميكالىق دامۋ جانە رەسپۋبليكالىق بيۋجەتتىڭ اتقارىلۋ قورىتىندىلارى قارالىپ جاتىر. قازاقستان ەكونوميكاسى 6 ايدا 6,2 پايىز ءوسىم كورسەتكەن.