مينيستر نۇرجىگىتوۆ سۋ سالاسىنىڭ ارداگەر ساراپشىسىمەن كەڭەسەتىنىن ايتتى

سىرداريا ارقىلى قازاقستانعا كىرەتىن سۋدىڭ ازايىپ بارا جاتقانى تابيعي وزگەرىستەرگە عانا بايلانىستى. سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ ب ا ق وكىلدەرىمەن وتكەن بريفينگىدە وسىنداي پايىم ايتتى، دەپ حابارلايدى Kazinform.

«ك س ر و كەزىندە سۋ رەسۋرستارى ءمينيسترى بولعان ناريمان قىپشاقپايەۆتىڭ ايتۋىنشا، 1991 -جىلعا دەيىن سىرداريا ارقىلى كەلەتىن سۋدىڭ ۇلەسى 17 ميلليارد تەكشە مەتردەن استام بولعان ەكەن. قازىر 10-12 ميلليارد تەكشە مەتر عانا. 30 جىلدىڭ ىشىندە 4 ميلليارد تەكشە مەتر ۇلەسىمىزدى جوعالتىپ وتىرمىز. مينيستر رەتىندە وسى ۇلەستى قايتارۋعا كۇش سالاسىز با؟»، - دەپ سۇرادى ب ا ق وكىلدەرى.

مينيستر بۇل ماسەلەنى سۋ سالاسىنىڭ ارداگەر ساراپشىسىمەن جەكە تالقىلاعانىن ايتادى.

«ناريمان قىپشاقپاي ۇلىمەن جولىققانمىن. وسى قىزمەتكە تاعايىندالا سالىپ، باردىم. ول كىسى اۋرۋحانادا جاتىر ەكەن. 1,5 ساعاتتان استام پىكىر بولىستىك. وسى سىرداريا بويىنشا دا ماسەلە كوتەرىلدى. ءوزىنىڭ ويىن، كوزقاراسىن ايتتى. ەندى سۋدىڭ كولەمى ءار وزەن بويىنشا جىل سايىن وزگەرىپ تۇرادى. ول سۋدىڭ قالىپتاسقان ءوز جاعدايىنا بايلانىستى. ءبىر جىلى سول سىرداريادان 12-15 ميلليارد تەكشە مەتر سۋ وتەدى. سۋ جوق جىلدارى 5-6 ميلليارد تەكشە مەترگە نەمەسە 7-8 ميلليارد تەكشە مەترگە ءتۇسىپ كەتۋى مۇمكىن. جالپى سۋ قاي جىلى قالاي قالىپتاسادى؟ ماسەلە سوعان بايلانىستى بولىپ تۇر.

ارينە، سۋدى كوبىرەك الۋعا مۇددەلىمىز. ءبىراق وعان ءوزىنىڭ بەكىتىلگەن كەلىسىمى بار. سول كەلىسىمدەر بويىنشا جۇمىس ىستەيمىز»، - دەدى نۇرجان نۇرجىگىتوۆ.

اۆتور

ەسىمجان ناقتىباي