مينيستر ەلدەگى ەڭ ۇزىن كوپىردى كۇتىپ ۇستاۋعا قانشا قارجى كەتەتىنىن ايتتى

استانا. KAZINFORM - كولىك ءمينيسترى مارات قارابايەۆ ءماجىلىس وتىرىسىنان كەيىن وتكەن باسپا ءسوز ءماسليحاتىندا شىعىس قازاقستان وبلىسىنىڭ بىرنەشە اۋدانىن وبلىس ورتالىعىمەن تىكەلەي بايلانىستىرۋ ءۇشىن سالىنعان ەلدەگى ەڭ ۇزىن كوپىردى كۇتىپ ۇستاۋعا قانشا قاراجات كەرەك بولاتىنىن ايتتى.

«جالپى ول كوپىر ستراتەگيالىق نىسان بولىپ تۇر. كوپىردەگى قوزعالىسقا مونيتورينگ جۇرگىزۋ ءۇشىن 102 كامەرا ورناتىلعان. كوپىرگە قىزمەت كورسەتۋ ءۇشىن جەكە بريگادا جۇمىلدىرىلاتىنىن ءسوزسىز. قاۋىپسىزدىك ماقساتىندا كوپىردىڭ ەكى باسىنا بلوك پوستار قويىلدى. ول پوستاردا پوليتسيا دەپارتامەنتىنىڭ بولىمشەلەرى جۇمىس ىستەيدى»، - دەدى ول.

ال كوپىردى كۇتىپ ۇستاۋ وبلىس اكىمدىگىنە جۇكتەلمەك.

«ال كۇتىپ ۇستاۋىنا كەلسەك، قاتەلەسپەسەم، 300 ميلليون تەڭگەدەي كەرەك. ونى ناقتىلاۋ كەرەك. بۇل جۇمىس وبلىس اكىمدىگىنىڭ قۇرىلىمىنداعى جەرگىلىكتى باعىنىستاعى جولداردىڭ بارىنە قىزمەت كورسەتەتىن ۇيىمعا جۇكتەلەدى»، - دەدى ول.

ەسكە سالساق، بۇعان دەيىن جەرگىلىكتى اكىمدىك جاڭا كوپىر تۇرعىندار ءۇشىن تەگىن بولاتىنىن ءمالىم ەتكەن ەدى.