مينيستر اجىراسۋ كوبەيگەنىن ايتىپ دابىل قاقتى

استانا. KAZINFROM - ادىلەت ءمينيسترى ەرلان سارسەمبايەۆ قازاقستانداعى وتباسىلىق-نەكە قاتىناسىنىڭ داعدارىسى تۋرالى مالىمدەدى. مۇنى ستاتيستيكا دا قۋاتتايدى.

ماجىلىستەگى ۇكىمەت ساعاتى كەزىندە ەرلان سارسەمبايەۆ قازاقستانداعى اجىراسۋ سانى بويىنشا جاعىمسىز ستاتيستيكانى كەلتىردى.

«بىلتىر 61080 اجىراسۋ دەرەگى تىركەلدى، بۇل - تىركەلگەن نەكەمەن سالىستىرعاندا (124774) جارتىسىنا جۋىعى. كەيبىر مەملەكەتتىك ورگاندار وتباسى ينستيتۋتىن نىعايتۋ جانە بالالاردىڭ مۇددەسىن قورعاۋ بويىنشا كەشەندى جۇمىس جۇرگىزۋگە ءتيىس دەپ سانايمىز. بۇل جاعداي مينيسترلىكتىڭ ەرەكشە باقىلاۋىندا»، - دەدى ول.

ءمينيستردىڭ ايتۋىنشا، قوعام بۇگىندە بۇرىنعى قۇندىلىقتاردان اجىراپ بارا جاتىر.

«ستاتيستيكا ءاربىر ەكىنشى نەكە بۇزىلىپ جاتقانىن كورسەتەدى. مۇندا وتباسى، ەڭ الدىمەن بالالار زارداپ شەگەدى... «قىزىل» ايماققا كىرگەن اليمەنتكە مىندەتتى 12 مىڭ ادام بار. ولارمەن جەكە سوت ورىنداۋشىلارى جۇمىس ىستەپ جاتىر. زاڭنامالىق تۇرعىدان العاندا اكىمشىلىك جانە قىلمىستىق جاۋاپكەرشىلىككە دەيىنگى تەتىكتەر جۇمىس ىستەيدى. ءبىراق بۇل ماسەلەنىڭ شەشىمى ەمەس ەكەنىن ءبىز دە تۇسىنەمىز»، - دەدى ەرلان سارسەمبايەۆ.

ال ۇلتتىق ستاتيستيكا بيۋروسىنىڭ رەسمي دەرەكتەرىنە سۇيەنسەك، قازاقستاندىقتار شاڭىراق كوتەرۋگە اسىقپايتىن بولعان.