مينسكىدە قازاقستاندىق «اقىلدى» جابدىقتار مەن روبوت جۇيەلەرى تانىستىرىلدى

استانا. KAZINFORM - قازاقستاننىڭ «اقىلدى» ستانوكتارى مەن روبوتتاندىرىلعان جۇيەلەرى مينسكىدە وتكەن «يننوپروم» ونەركاسىپ كورمەسىندە كورسەتىلدى، دەپ حابارلايدى ۇكىمەتتىڭ باسپا ءسوز قىزمەتى.

مينسكىدە وتكەن «يننوپروم. بەلارۋس» حالىقارالىق كورمەسى اياسىندا قازاقستاندىق كاسىپورىندار ونەركاسىپتى سيفرلاندىرۋ سالاسىنداعى ازىرلەمەلەرىن ۇسىندى.

ۇلتتىق پاۆيلون پلاتفورماسىندا وندىرىسكە جاساندى ينتەللەكتى ەنگىزگەن وتاندىق كومپانيالاردىڭ شەشىمدەرى كورسەتىلدى. ەكسپوناتتار اراسىندا روبوتتاندىرىلعان جۇيەلەر مەن وندىرىستىك پروتسەستەردىڭ قاۋىپسىزدىگىنە ارنالعان «اقىلدى» قۇرىلعىلار بار. بۇل جوبالار مەملەكەت باسشىسىنىڭ جاساندى ينتەللەكتىنى ءومىردىڭ بارلىق سالالارىنا ەنگىزۋ جونىندەگى تاپسىرمالارى اياسىندا جۇزەگە اسىرىلىپ جاتىر.

مۇنداي تەحنولوگيالاردى ەنگىزۋدىڭ مىسالى رەتىندە اۋىل شارۋاشىلىعى تەحنيكاسى مەن جيىنتىق بولشەكتەرىن شىعاراتىن «قازاقستاندىق اگرويننوۆاتسيالىق كورپوراتسياسىن» ايتۋعا بولادى. كومپانيا ساندارمەن باسقارىلاتىن جابدىققا كوشتى. ەندى ماشينالار قولمەن ەمەس، سيفرلىق باعدارلامامەن جۇمىس ىستەيدى: ينجەنەرلەر بولىكتىڭ 3D مودەلىن جاساپ شىعارعان سوڭ «اقىلدى» ستانوك ونى مەتالدان جوعارى دالدىكپەن جونىپ شىعادى. بۇل ءتاسىل بۇرىن شەتەلدەن ساتىپ الىناتىن كۇردەلى كومپونەنتتەردى شىعارۋعا جانە وندىرىستەگى لوكاليزاتسيا دەڭگەيىن %86 عا دەيىن كوتەرۋگە مۇمكىندىك بەرەدى.

سيفرلاندىرۋ تەك ءوندىرىستى عانا ەمەس، سونىمەن قاتار قىزمەت كورسەتۋدى دە قامتيدى. جاڭا جابدىق جاھاندىق تەحنيكالىق قولداۋ كورسەتۋ جەلىلەرىنە كىرىكتىرىلگەن، بۇل قاشىقتان دياگنوستيكا جاساپ، باعدارلامانى باپتاۋدى قامتاماسىز ەتەدى.

- ءبىزدىڭ وندىرىسكە روبوتتاندىرىلعان كەشەندەر ەنگىزىلگەن، ەندى بىرتىندەپ سيفرلاندىرۋعا كوشۋدەمىز. جاساندى ينتەللەكتىنى قولدانىپ، ونى كۇندەلىكتى جۇمىسقا كىرىكتىرمەكپىز، بۇل بىزگە دامۋعا كومەكتەسىپ، ناقتىلىقتى، ساپانى جانە جىلدامدىقتى قامتاماسىز ەتەدى. پرەزيدەنت ەڭبەك ونىمدىلىگىن ەكى ەسەگە ۇلعايتۋعا باسا ءمان بەرىپ وتىر، ال وندىرىستىك قۋاتتى كۇشەيتىپ الماي بۇل مۇمكىن ەمەس. وسى ماقساتتا مەملەكەت ماشينا- تراكتور پاركىن جاڭارتۋعا قوماقتى قاراجات بولۋدە. ەندەشە نارىقتاعى سۇرانىستى تولىق قامتۋعا مىندەتتىمىز: نارىق ءتيىستى ساپاداعى ءونىمدى تالاپ ەتەدى، ءال بىز ونى قامتاماسىز ەتۋىمىز كەرەك، - دەپ اتاپ ءوتتى كورپوراتسيا ديرەكتورى ولەگ بالىبين.

وسىعان دەيىن پرەمەر-مينيستر ولجاس بەكتەنوۆ مينسكىدە «يننوپروم. بەلارۋس» حالىقارالىق ونەركاسىپ كورمەسىنە ارالاپ، «جاڭا تەحنولوگيالار وداعى: بولاشاق ونەركاسىپتى قۇرۋ» تاقىرىبىنداعى پلەنارلىق سەسسيادا ءسوز سويلەگەن ەدى.