«ميلليونمەن دەكرەتكە» كۋرسىنىڭ اۆتورلارى جاۋاپقا تارتىلا ما - مينيسترلىك جاۋابى

استانا. KAZINFORM - ەڭبەك جانە حالىقتى الەۋمەتتىك قورعاۋ مينيسترلىگى جۇكتىلىك پەن بوسانۋ تولەمدەرىنىڭ سوماسىن ۇلكەيتۋدىڭ ادىستەرىن ۇيرەتەتىن كونسۋلتاتسيالىق قىزمەتتەردىڭ ۇستىنەن شاعىم تۇسىرگەن. بۇل تۋرالى ۆەدومستۆونىڭ Kazinform ساۋالىنا جولداعان جاۋابىندا ايتىلادى.

ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا ب ا ق وكىلدەرىنە جۇكتىلىك پەن بوسانۋ تولەمدەرىن شامادان تىس راسىمدەگەن 113 ادامنىڭ ۇستىنەن قىلمىستىق 16 ءىس قوزعالعانىن ءمالىم ەتكەن بولاتىن. Kazinform وسى قىلمىستىق ىستەردىڭ وربيتاسىندا «ميلليونمەن دەكرەتكە» كۋرسىنىڭ اۆتورلارى بار-جوعىن سۇرادى.

- بۇگىندە ءبىز الەۋمەتتىك جەلىلەردە (Instagram ،Facebook جانە ت. ب. ) ءۇشىنشى تۇلعالاردىڭ تاراپىنان ءار ءتۇرلى كونسۋلتاتسيالىق قىزمەتتەردىڭ، ونىڭ ىشىندە كاسىپكەرلىك سۋبەكتىلەرى مەن دەكرەتتىك دەمالىسقا شىعۋدى جوسپارلاپ وتىرعان ايەلدەر اراسىندا «فورمالدى» ەڭبەك شارتتارىن جاساسۋ ارقىلى الەۋمەتتىك تولەمدەردى جوعارى مولشەردە الۋ تاسىلدەرىنىڭ ايتارلىقتاي وسكەنىن بايقاپ وتىرمىز، - دەپ جازىلعان جاۋاپتا.

وسى ورايدا قازىر قۇزىرلى ورگاندار تەرگەۋ جۇمىستارىن جۇرگىزىپ جاتىر.

- اتالعان ماسەلە بويىنشا مينيسترلىك پەن مەملەكەتتىك الەۋمەتتىك ساقتاندىرۋ قورى وزدەرىنىڭ قۇزىرەتى بويىنشا ءتيىستى ءىس-شارالار جۇرگىزۋ ءۇشىن قۇقىق قورعاۋ ورگاندارىنا ءبىرقاتار وتىنىشكە باستاماشىلىق جاسادى. قوزعالعان قىلمىستىق ىستەر شەڭبەرىندە جەدەل تەرگەپ-تەكسەرۋ جۇمىستارى جۇرگىزىلىپ جاتىر. قازاقستان رەسپۋبليكاسى قىلمىستىق-پروتسەستىك كودەكسىنىڭ 201-بابىنا سايكەس سوتقا دەيىنگى تەرگەپ-تەكسەرۋ دەرەكتەرىن جاريا ەتۋگە جول بەرىلمەيدى، - دەپ جازىلعان جاۋاپتا.

سونداي-اق، بىلتىر كۇزدە انتيكور شىعىس قازاقستان وبلىسىندا 780 ايەلدىڭ دەكرەتتىك تولەمدى ارتتىرۋ ءۇشىن جەكە كاسىپكەر رەتىندە تىركەلگەنىن انىقتاعان بولاتىن.

اۆتور

ەسىمجان ناقتىباي