ميللياردەر مايكل لينچتىڭ سۋعا باتىپ كەتكەن سۋپەرياحتاسى تەڭىز تۇبىنەن شىعارىلدى
استانا. KAZINFORM - يتاليانىڭ سيتسيليا جاعالاۋىندا 10 اي بۇرىن باتىپ كەتكەن Bayesian سۋپەرياحتاسى سۋ تۇبىنەن شىعارىلدى، دەپ حابارلايدى Associated Press.
ەكى مينۋتتا سۋعا باتىپ كەتكەن كەمەنى كوتەرۋ وپەراتسياسىنىڭ ءۇش كۇنگە سوزىلعانى اتاپ ءوتىلدى.
ياحتانى سيتسيلياداعى تەرميني- يمەرەس پورتىنا جەتكىزۋ جوسپارلانعان، وندا تەرگەۋشىلەر اپاتتىڭ سەبەپتەرىن انىقتاۋمەن اينالىسادى.
بريتاندىق ميللياردەر مايكل لينچكە تيەسىلى ياحتا 2024 -جىلدىڭ 19 -تامىزىندا اۋدارىلدى. ول كەزدە بورتىندا 22 ادام بولعان. قازا تاپقاندار اراسىندا مايكل لينچ، ونىڭ 18 جاسار قىزى حاننا جانە Morgan Stanley International ۇيىمىنىڭ ءتوراعاسى دجوناتان بلۋمەر بار. ياحتا جاعالاۋدان 800 مەتردەي جەردە بولعان.
قۇنى 35 ميلليون ەۋرو تۇراتىن 56 مەترلىك Bayesian ياحتاسىنىڭ بورتىندا ۇلى بريتانياداعى ەڭ تابىستى تەحنولوگيالىق كاسىپكەرلەردىڭ ءبىرى مايكل لينچ بولدى. لينچتى «بريتاندىق بيلل گەيتس» دەپ اتاعان. ول ۇلى بريتانياداعى ەڭ ءىرى باعدارلامالىق قامتاماسىز ەتۋ كومپانيالارىنىڭ ءبىرى Autonomy كومپانياسىن قۇردى جانە ونى 2011 -جىلى HP كومپانياسىنا 11 ميلليارد دوللارعا ساتۋعا تىرىستى. ءبىراق امەريكاندىق تەحنولوگيالىق الپاۋىت ونى الاياقتىقپەن ايىپتاعاننان كەيىن مامىلە ءساتسىز اياقتالدى. ماۋسىم ايىندا سان-فرانسيسكو سوتى ونى بارلىق ايىپتاردان اقتادى.
كەمە ەكيپاجىنىڭ ءۇش مۇشەسى جاۋاپسىزدىق جانە كەمەنى جاقىنداپ كەلە جاتقان داۋىلدان قۇتقارا الماعانى ءۇشىن ايىپتالۋدا. ايىپتاۋشى تاراپتىڭ ايتۋىنشا، ولار Bayesian نىڭ سۋعا باتىپ بارا جاتقانىن تۇسىنبەگەن، شۇعىل شارالار قولدانباعان جانە جولاۋشىلارعا قاۋىپ تۋرالى ەسكەرتپەگەن.
ەسكە سالا كەتەيىك، سيتسيليا جاعالاۋىنداعى كەمە اپاتىندا بريتانيالىق كاسىپكەر مايكل لينچ ءىز-ءتۇسسىز جوعالعانى جايلى جازعان ەدىك.
اۆتور
بەگابات ۇزاقوۆ
