مىڭعا جۋىق قازاقستاندىق جاڭا بيزنەس-يدەيالاردى جۇزەگە اسىرۋ ءۇشىن گرانتتار الدى

استانا. KAZINFORM - جىل باسىنان بەرى حالىقتىڭ الەۋمەتتىك وسال توپتارىنا جاتاتىن ازاماتتارعا جاڭا بيزنەس- يدەيالاردى جۇزەگە اسىرۋ ءۇشىن 4207 گرانت، ونىڭ ىشىندە اۋىل تۇرعىندارىنا 2665 گرانت بەرىلدى. 2025 -جىلى بارلىعى 9080 گرانت بەرۋ جوسپارلانىپ وتىر.

مەملەكەتتىك گرانتتاردى الۋعا وتىنىمدەر 2025 -جىلدىڭ 21 -مامىرى مەن 3 -ماۋسىمى ارالىعىندا قابىلداندى. بۇگىنگى تاڭدا ۇمىتكەرلەردىڭ وتىنىشتەرىن قاراۋ جونىندەگى كوميسسيالار ءوز جۇمىسىن اياقتاپ، بارلىق قاراجات گرانت الۋشىلاردىڭ شوتىنا اۋدارىلدى.

-ءوتىنىش بەرۋشىلەردەن بارلىعى 11,5 مىڭنان استام ءوتىنىش، ونىڭ ىشىندە كوپبالالى وتباسىلاردان - 7 450، مۇگەدەكتەردەن — 1 856، مۇمكىندىگى شەكتەۋلى بالانى كۇتۋشىلەردەن — 1334، اتاۋلى الەۋمەتتىك كومەك الۋشىلاردان — 289 ءوتىنىش قارالدى. سونداي-اق اسىراۋشىسىنان ايىرىلعان 384 ادام، قونىس اۋدارعان 93، قانداستاردان 73 ءوتىنىش تۇسكەن.

وتىنىشتەردىڭ ەڭ كوپ سانى تۇركىستان (2065 ادام)، قىزىلوردا (1296 ادام)، جامبىل (1133 ادام) وبلىستارى مەن شىمكەنت قالاسىنان (934 ادام)، ەڭ از كورسەتكىش ۇلىتاۋ وبلىسى (78 ادام) مەن قوستاناي وبلىسىنان (202 ادام) تۇسكەن.

گرانتتار نەگىزىنەن تەحنولوگيالىق قۇرال- جابدىقتاردى الۋعا - 1 856، تاۋارلىق-ماتەريالدىق قۇندىلىقتاردى، قۇرال- سايمانداردى ساتىپ الۋعا - 1 236، مال شارۋاشىلىعىنا – 1013، ءۇي-جايلارىن جالعا الۋعا - 60 جانە وسىمدىك شارۋاشىلىعىنا - 42 بەرىلدى.

گرانت يەگەرلەرى ساناتتارى بويىنشا كوپبالالى وتباسى مۇشەلەرىنە - 2723، مۇگەدەكتەرگە — 657، مۇگەدەك بالالاردى تاربيەلەپ وتىرعان اتا- انالارعا — 488، اتاۋلى الەۋمەتتىك كومەك الۋشىلارعا — 126، اسىراۋشىسىنان ايىرىلۋ بويىنشا جاردەماقى الۋشىلارعا — 145، قونىس اۋدارۋشىلارعا — 39، قانداستارعا — 29 جاردەماقى تاعايىندالدى، — دەلىنگەن حابارلامادا.

ەسكە سالايىق، گرانتتاردى ەڭبەك ۇتقىرلىعى ورتالىقتارى ۇمىتكەرلەردىڭ وتىنىشتەرىن قاراۋ جونىندەگى اۋداندىق/قالالىق كوميسسيانىڭ شەشىمى نەگىزىندە بەرەدى.

ءوتىنىش بەرۋشىلەر وزدەرىنىڭ بيزنەس- جوباسىن كوميسسيا وتىرىستارىندا ۇسىنادى. كوميسسيا وتىرىسىنىڭ وتەتىن ورنى، كۇنى جانە ۋاقىتى تۋرالى حابارلاما گرانتقا ۇمىتكەردىڭ Business.enbek.kz پورتالىنداعى جەكە كابينەتىندە كورسەتىلەدى.

بۇل رەتتە كوميسسيانىڭ ءاربىر مۇشەسى بيزنەس- جوسپاردى باعالايدى جانە كەلەسى كريتەرييلەر بويىنشا باعالاۋ پاراعىن تولتىرادى: بيزنەس- يدەيانىڭ باسەكەگە قابىلەتتىلىگى، وتكىزۋ نارىقتارىنىڭ دامۋى، بيزنەس- جوبانىڭ قارجىلىق تۇراقتىلىعى، كاسىپكەرلىك داعدىلارىنىڭ دەڭگەيى، جاڭا جۇمىس ورىندارىن قۇرۋ.

وسىلايشا، گرانت بەرۋ تۋرالى شەشىمدى كوميسسيا قابىلدايدى جانە ۇمىتكەرلەردىڭ بيزنەس- جوبالارىن ازىرلەۋدى باعالاۋدىڭ ناقتى كريتەرييلەرى نەگىزىندە جۇزەگە اسىرىلادى.

كوميسسيانىڭ شەشىمى تۋرالى اقپارات ءوتىنىش بەرۋشىنىڭ Business.enbek.kz پورتالىنداعى جەكە كابينەتىنە جىبەرىلەدى. ناتيجە وڭ بولعان جاعدايدا، ءوتىنىش بەرۋشى سالىق ورگاندارىندا قىزمەتىن تىركەيدى، بانكتىك دەرەكتەمەلەردى بەرەدى، كەلىسىمگە قول قويادى، سودان كەيىن بولىنگەن قاراجاتتىڭ پايدالانىلۋى تۋرالى توقسان سايىنعى ەسەپ بەرەدى. مۇنىڭ بارلىعى ەڭبەك موبيلدىلىگى ورتالىقتارىنا بارماي- اق ەلەكتروندى تۇردە جۇزەگە اسىرىلادى.