مىڭباي ءراش ومىردەن ءوتتى

اقىن، ساتيريك، ادەبيەتتانۋشى، قازاقستاننىڭ ەڭبەك سىڭىرگەن مادەنيەت قىزمەتكەرى مىڭباي ءراش دۇنيەدەن وزدى. بۇل تۋرالى قازاقستان جازۋشىلار وداعى Telegram ارناسىندا ءمالىم ەتتى، دەپ حابارلايدى Kazinform.

مىڭباي ءراش 1930 -جىلى 19-قازاندا سەمەي وبلىسى، شۇبارتاۋ اۋدانىنىڭ 10 اۋىلىندا دۇنيەگە كەلگەن.

اباي اتىنداعى قازاق پەداگوگيكالىق ينستيتۋتىنىڭ ءتىل جانە ادەبيەت فاكۋلتەتىن بىتىرگەن سوڭ «لەنينشىل جاس» (قازىرگى «جاس الاش» ) گازەتىندە، «ارا -شمەل» جۋرنالدارىندا ءبولىم مەڭگەرۋشىسى بولىپ قىزمەت اتقارعان. قازاق ك س ر كينەماتوگرافيا جونىندەگى مەملەكەتتىك كوميتەتىندە، «عىلىم» باسپاسى مەن «قازاقستان» باسپاسىنىڭ باس رەداكتورى، قازاقستان جازۋشىلار وداعىندا ادەبي كەڭەسشى بولىپ جەمىستى ەڭبەك ەتكەن.

تۇڭعىش ولەڭدەر جيناعى 1955 -جىلى «العاشقى بوروزدا» دەگەن اتپەن جارىققا شىقتى.

«قالامگەر اعامىزدىڭ جيىرمادان استام ولەڭدەر جيناعى مەن ساتيرالارى كىتاپ بولىپ شىققان. مىڭباي ءراش كوبىنەسە ساتيرا جانرىندا ەڭبەك ەتىپ، سىقاقتارى مەن فەلەتوندارى، مىسالدارى كورشىلەس، تۋىسقان حالىقتار تىلدەرىنە اۋدارىلعان. زامانىندا سىقاق جانرىنداعى ەڭبەگىن زاڭعار جازۋشى عابيت مۇسىرەپوۆ ەرەكشە باعالاعانىن جاقسى بىلەمىز. كەشەدەن بەرى قازاقستان جازۋشىلار وداعىنىڭ باسقارماسى ابىز اقساقالدى سوڭعى ساپارعا شىعارىپ سالۋ ماسەلەسىمەن اينالىسىپ جاتىر. جانازاسى، اسى قايدا، قاشان وتەتىنىن قوسىمشا حابارلايمىز»، - دەپ جازىلعان جازۋشىلار وداعى تاراتقان حابارلامادا.

اۆتور

دۋمان ارعىنگەلدى