ميانماداعى قۇتقارۋ جۇمىستارىن ىستىق كۇن رايى مەن ەلدەگى قارۋلى قاقتىعىس قيىنداتۋدا

استانا. KAZINFORM - ميانماداعى جويقىن جەر سىلكىنىسى ايماعىندا ەلەكتر قۋاتى ءجيى اجىراپ، تازا سۋدىڭ بەرىلۋى شەكتەلىپ جاتىر، دەپ حابارلايدى انادولى.

سونىمەن قاتار، ادام كۇشىنىڭ، قارجىلىق قولداۋدىڭ جەتكىلىكسىزدىگى جانە اسكەريلەردىڭ بەيبىت تۇرعىندارعا شابۋىلداۋى ىزدەۋ-قۇتقارۋ جۇمىستارىن قيىنداتقان.

28-ناۋرىزدا ميانمانىڭ ورتالىق بولىگىندە بولعان 7,7 جانە 6,4 بالدىق جەر سىلكىنىسى 3145 ادامنىڭ ءومىرىن قيدى، تاعى 4589 ادام جاراقات الدى.

اپات ايماقتارىنداعى ونسىز دا اۋىر جاعدايدى 40 گرادۋسقا دەيىن جەتكەن ىستىق اۋا رايى ۋشىقتىرىپ وتىر.

سونىمەن قاتار، اۋا رايى بولجامىنا سايكەس الداعى ايلاردا وڭىردە مۋسسوندىق جاۋىن-شاشىن كۇتىلەدى. ول جاعدايدى ودان سايىن ناشارلاتۋى مۇمكىن. ويتكەنى شاتىرلاردى پانالاۋعا ءماجبۇر بولعان جەرگىلىكتى تۇرعىنداردىڭ ومىرىنە قاۋىپ توندىرەدى. بۇدان بولەك بيلىك جەر سىلكىنىسى ايماعىندا جۇقپالى اۋرۋلار تارالۋى مۇمكىن ەكەنىن ەسكەرتەدى.

قۇتقارۋشىلار ءالى دە ءبىرقاتار اۋىلدىق جەرگە جەتە الماي وتىر، سوندىقتان ەل بيلىگى قۇرباندار سانى كوبەيۋى مۇمكىن ەكەنىن جوققا شىعارمايدى.

ەلدەگى قارۋلى قاقتىعىس تا اپات سالدارىن جويۋعا كەدەرگى كەلتىرىپ جاتىر.

ميانما بويىنشا ساراپشى جانە Southeast Asia Innovation Forces (FORSEA) نەگىزىن قالاۋشى ماۋنگ زارنيدىڭ سوزىنشە، جەر سىلكىنىسى ايماعىندا ەپيدەميا ءورشۋى مۇمكىن. زارني اتاپ وتكەندەي، بۇل ءبىرىنشى كەزەكتە تازا سۋدىڭ جەتىسپەۋشىلىگىنەن تۋىندايدى.

مامان ميانما تابيعي اپاتتارعا، ەڭ الدىمەن سۋ تاسقىنى مەن جويقىن جەر سىلكىنىستەرىنە مۇلدەم دايىن ەمەس ەكەنىن ايتتى.

زارني ميانماعا كورشى ەلدەردەن كەلگەن كومەك ىزدەۋ-قۇتقارۋ جۇمىستارىن ىلگەرىلەتۋگە ىقپال ەتكەنىن اتاپ ءوتتى. ول وننان استام ەل جاردەمدەسىپ جاتقانىن العا تارتتى.

بيرما ادام قۇقىقتارى جەلىسىنىڭ (BHRN) ديرەكتورى جو ۆيننىڭ ايتۋىنشا، جەر سىلكىنىسى كەزىندە عاسىرلار بويى قىزمەت ەتىپ كەلە جاتقان مەشىتتەرگە دە زاقىم كەلگەن. جو قايتىس بولعانداردىڭ اراسىندا كوپتەگەن مۇسىلمان بولعانىن ايتتى، ويتكەنى جەر سىلكىنىسى جۇما نامازى كەزىندە بولدى. ونىڭ دەرەكتەرىنە سايكەس 67 مەشىت جارامسىز كۇيگە تۇسكەن.

وسىعان دەيىن 28-ناۋرىزداعى جويقىن جەر سىلكىنىسىنەن كەيىن جابىلعان يانگون- ماندالاي تەمىرجول جەلىسى مەن ماندالاي حالىقارالىق اۋەجايى قايتا اشىلعانى حابارلاندى.