موپەدكە مەملەكەتتىك ءنومىر الۋ مەرزىمى ۇزارتىلا ما

استانا. KAZINFORM - ىشكى ىستەر ءمينيسترىنىڭ ورىنباسارى يگور لەپەحا ءماجىلىستىڭ جالپى وتىرىسىنان كەيىن موپەدىن تىركەپ ۇلگەرمەگەن قازاقستاندىقتارعا ۇندەۋ جاسادى.

- موپەدتەر بويىنشا ايتسام، جاۋاپكەرشىلىك كۇشىنە ەنەدى. دەپۋتاتتار بۇكىل موپەد جۇرگىزۋشى كۋالىگىن الىپ، تىركەلىپ ۇلگەرسىن دەپ ادەيى ۇزاق مەرزىم بەلگىلەگەن بولاتىن. وتە كوپ ۋاقىت بەرىلدى. كەيىنگى كەزدە كۇن سايىن موپەدتەرىڭىزدى ەسەپكە قويىپ، جۇرگىزۋشى كۋالىگىن الىڭىزدار دەگەن ماندە ۇندەۋ تاستاپ جاتىرمىز. ءتىپتى ازاماتتارعا ارنالعان ۇكىمەت كورپوراتسياسىنان جۇمىس ۋاقىتىن ۇزارتۋدى سۇرادىق، - دەدى ول.

ءى ءى م وكىلى زاڭ تالابىنا باعىنباعانداردى قانداي جازا كۇتىپ تۇرعانىن ەسكە سالدى.

- 5-ساۋىردەن باستاپ ازامات جۇرگىزۋشى كۋالىگى مەن مەملەكەتتىك تىركەۋ ءنومىرى جوق موپەد جۇرگىزسە، اكىمشىلىك جاۋاپكەرشىلىككە تارتىلادى. موپەد ايىپ تۇراعىنا الىنىپ، مەملەكەتتىك تىركەۋ ءنومىرىن العانشا يەسىنە قايتارىلمايدى. سوندىقتان بارشاڭىزعا موپەدتەرىڭىزدى تىركەتىپ ۇلگەرىڭىزدەر دەگىم كەلەدى، - دەدى يگور لەپەحا.

بۇعان دەيىن موپەد تىزگىندەگەندەرگە قۇجاتىن زاڭعا ساي رەتتەۋگە بەرىلگەن ۋاقىت 2 كۇننەن كەيىن اياقتالاتىنىن جازعان ەدىك.