موڭعولياداعى قازاق قىزى 2024-جىلدىڭ ۇزدىك سپورتشىلارىنىڭ ءبىرى اتاندى
استانا. KAZINFORM - موڭعوليانىڭ ۇلان-باتىر قالاسىندا وتكەن «بورتە چونو» ماراپاتتاۋ سالتاناتىندا 2024-جىلدىڭ ۇزدىك سپورتشىلارى انىقتالدى.
جىل قورىتىندىسى بويىنشا، موڭعوليانىڭ 3x3 باسكەتبول قۇراماسى ەڭ ۇزدىك دەپ تانىلعان. بۇل كوماندانىڭ ىشىندە قازاق قىزى، جارتىلاي قورعاۋشى بۇلبۇل مۇرات تا بار.
بۇلبۇل مۇرات قىزى - سپورت سالاسىندا موڭعوليا قازاق قىزدارى اراسىندا الەمدىك دەڭگەيدە تانىلعان العاشقى ارۋ. ول موڭعوليانىڭ نالايح قالاسىنىڭ تۋماسى. قازىرگى تاڭدا «حاسىن حۇلەگۇۇد» (قاسقىرلار كومانداسى - اۆت.) كلۋبىمەن موڭعوليانىڭ ىشكى بىرىنشىلىگىندە ويناپ، ەكى رەت چەمپيون اتانعان.
بۇلبۇل 2018-جىلى دجاكارتادا وتكەن ازيا چەمپيوناتىندا قولا مەدالعا قول جەتكىزىپ، 2023-جىلى حاڭجوۋداعى ازيا ويىنداردا كۇمىس مەدالدى جەڭىپ العان.
قازاق قىزى جىلدىڭ ۇزدىگى اتانعان سوڭ «ءبىرىنشى بول» تىلشىسىنە ءوز اسەرىمەن ءبولىستى.
«جىلدىڭ ۇزدىگى ماراپاتىن العانىما وتە قۋانىشتىمىن. باسكەتبول - بىرلىكتى تالاپ ەتەتىن ويىن. مەن جەتى جاسىمنان باستاپ بۇل سپورتپەن اينالىستىم. 3x3 كومانداسىندا 2024-جىلدىڭ مامىر ايىنان باستاپ ويناپ كەلەمىن. بولاشاقتا قازاقستانعا قىدىرىپ بارۋدى ويلاپ ءجۇرمىن. ءبىراق تۇبەگەيلى كوشىپ بارۋ ويىمدا جوق. قازىرگى تاڭدا ۇلان-باتوردا اناممەن جانە قىزىممەن بىرگە تۇرامىن»، - دەدى ول.
ايتا كەتەيىك، موڭعوليانىڭ 3x3 باسكەتبول قۇراماسى 2024-جىلى ازيا چەمپيوناتىندا قولا مەدال، FIBA 3x3 Women’s Series ۇلان-باتور تۋرنيرىندە 1-ورىن، FIBA 3x3 Women’s Series Chengdu تۋرنيرىندە ۇزدىك بەستىكتەن كورىنگەن، ال FIBA 3x3 Women’s Series Wuhan تۋرنيرىندە ۇزدىك ۇشتىكتى تۇيىندەگەن.
