موڭعوليادا ونكولوگيالىق ناۋقاستارعا يممۋندىق تەراپيا قولجەتىمدى بولماق

موڭعوليا دەنساۋلىق ساقتاۋ مينيسترلىگى، ونكولوگيانى ۇلتتىق مەديتسينالىق زەرتتەۋ ورتالىعى (و ۇ م ز و) مەن شۆەيساريالىق «F.Hoffmann-La Roche» كومپانياسى ونكولوگيالىق اۋرۋلاردى جۇيەلى ەمدەۋدىڭ ەڭ جاڭا تەحنولوگيالارىنىڭ ءبىرى - قاتەرلى ىسىككە قارسى يممۋنداۋ تەراپياسىن باستاۋ تۋرالى مەموراندۋمعا قول قويدى، دەپ جازادى montsame.mn اگەنتتىگى.

موڭعوليا ونكولوگيالىق اۋرۋلارعا، اسىرەسە باۋىردىڭ قاتەرلى ىسىگىنە شالدىققان نەمەسە سونىڭ سالدارىنان قايتىس بولعان ادامدار سانى بويىنشا ازيادا عانا ەمەس، الەمدە الدىڭعى قاتاردا تۇر. دەنساۋلىق ساقتاۋ مينيسترلىگىنىڭ دەرەگىنشە، 2022 -جىلى ونكولوگيالىق اۋرۋلاردان 4548 ادام قازا تاپتى، ونىڭ 2635 - ى ەر ادام بولسا، 1913- ى - ايەل.

ءۇش جىلدان بەرى موڭعوليا «ر ا س ە نەمەسە بارلىق ءدارى ناۋقاسقا ءبىر باعامەن» دەپ اتالاتىن شۆەيساريالىق باعدارلاماعا قاتىسىپ كەلەدى. دوزاسىنا قاراي باۋىر قاتەرلى ىسىگىنە شالدىققان ناۋقاستار 8000 نان 9392 دوللار نەمەسە 20-32 ميلليون توگىرىك (موڭعوليانىڭ ۇلتتىق ۆاليۋتاسى) تۇراتىن ءبىر ينەكسيانى الادى. ءبىراق وسى باعدارلاما اياسىندا بۇل دارىلەر موڭعولياعا شامامەن 1000 دوللارعا جەتكىزىلەدى.

وسىعان بايلانىستى و ۇ م ز و ديرەكتورى ن. ەردەنەحۋۋ بىلاي دەدى: «يممۋنداۋ تەراپياسى ازاماتتارعا قارجىلاي سالماق سالمايتىنداي تاسىلمەن ەنگىزىلىپ جاتقانىنا قۋانىشتىمىن. ەمدەۋ باعاسى جوعارى بولعاندىقتان مەديتسينالىق ساقتاندىرۋدى نارىق باعاسىمەن الۋ مۇمكىن بولمادى. سول سەبەپتى ر ا س ە باعدارلاماسىنا قوسىلۋ تۋرالى شەشىم قابىلداندى. ونىڭ ىشىندە ءبىر ناۋقاسقا 8 ميلليون توگىرىك تۇراتىن يممۋنداۋ تەراپياسى قولجەتىمدى بولماق.

يممۋنداۋ تەراپياسىنىڭ باستى ەرەكشەلىگى - ادام اعزاسىنىڭ يممۋندىق جۇيەسى ءوزى بەلسەندى بولىپ، ىسىكتى دارىلەرمەن ەمەس، ادامنىڭ يممۋندىق جاسۋشالارىمەن جويادى. جوبا ءۇش جىلعا سوزىلادى. العاشقى قىرىق ناۋقاس و ۇ م ز و قاراجاتى ەسەبىنەن ەم الادى. العاشقى ناۋقاستارعا ەم وڭ ناتيجە كورسەتىپ جاتسا، ەمدەۋ ءتاسىلى باسقالارعا دا قولجەتىمدى بولادى. ازاماتتاردا يممۋندىق تەراپيانى «دەنساۋلىق قورىنداعى جاڭا «يممۋنداۋ تەراپياسى پاكەتى» اياسىندا ساقتاندىرۋ ارقىلى الۋ مۇمكىندىگى بولادى».

اۆتور

بالنۇر قوجاگەلدى