موڭعوليادا تۇراتىن قازاقتارعا 5 مىڭ دانا كىتاپ جەتكىزىلدى
ۇلانباتىر. KAZINFORM - موڭعولياداعى قازاق دياسپوراسىنا 5 مىڭ دانا كىتاپ جەتكىزىلدى. ولاردى ۇلانباتىردا رەسمي ءىس-ساپارمەن جۇرگەن سىرتقى ىستەر ءمينيسترى مۇرات نۇرتىلەۋ سالتاناتتى تۇردە تابىس ەتتى.
بۇل باستامانى ق ر سىرتقى ىستەر مينيسترلىگى، مادەنيەت جانە اقپارات مينيسترلىگى جانە «وتانداستار قورى» قازاقستان مەن موڭعوليا اراسىنداعى مادەني-گۋمانيتارلىق بايلانىستاردى نىعايتۋ ماقساتىندا قولعا العان.
بەس مىڭ كىتاپ اراسىندا زاماناۋي قازاق اقىن-جازۋشىلارىنىڭ شىعارمالارى جانە بالالار ادەبيەتىنىڭ جاڭا جيناقتارى بار.
− موڭعولياداعى قازاقتار - ەكى ەل اراسىنداعى بەرىك دوستىقتىڭ التىن كوپىرى. ولارعا ءوز مادەنيەتى مەن ءتىلىن ساقتاۋعا قامقورلىق تانىتىپ، قولداپ جۇرگەنى ءۇشىن موڭعول مەملەكەتىنىڭ باسشىلىعىنا جانە ۇكىمەتىنە ۇلكەن العىسىمىزدى جەتكىزگىم كەلەدى. مەن دە بۇگىن وسى ەلدەگى قازاقتارعا 5 مىڭ دانا كوركەم ادەبي كىتاپتار سىيلاعىم كەلگەن بولاتىن. بۇل رەتتە ارىپتەسىمە وسى ناۋقانعا قولداۋ كورسەتكەنى ءۇشىن تاعى دا العىس بىلدىرەمىن، - دەپ اتاپ ءوتتى مۇرات نۇرتىلەۋ موڭعوليا سىرتقى قاتىناستار ءمينيسترى ب. باتتسەتسەگپەن كەزدەسۋىندە.
ايتا كەتەيىك، موڭعوليا -قازاق دياسپوراسى كوپ تۇراتىن ەلدىڭ ءبىرى. بۇگىندە موڭعوليادا حالىق سانى 3,5 ميلليوننان اسادى، وندا 28 ۇلت، ۇلىس جانە ەتنوستىق توپ بار. قازاقتار ەل حالقىنىڭ % 4 قۇرايدى.
ارينە، سىيلىقتى مۇنداعى قازاقتار قۋانا قابىل الدى. موڭعوليانىڭ حالىق جازۋشىسى، مەملەكەت جانە قوعام قايراتكەرى، ديپلومات سۇلتان تاۋكەي ۇلىنىڭ ايتۋىنشا، قازىر موڭعوليادا 150 مىڭنان استام قازاقتار ءومىر سۇرەدى. كوپتەگەن قازاقتار اتاجۇرتقا - قازاقستانعا قونىس اۋدارىپ جاتىر.
− بۇل كىتاپتى جاڭا ءبىزدىڭ پارلامەنتتەگى ازاماتتار قابىلدادى. بايان ولگەيدە ايماقتىق كىتاپحانا بار، سوعان بارادى. ودان بولەك 13 اۋدان بار، بىزدە اۋداندى «سۋمىن» دەپ اتايدى. اۋداندىق كىتاپحانالارعا بارادى، قىرىقتان استام مەكتەپ بار. سول مەكتەپتەردىڭ ءبارى قازاق تىلىندە وقيدى. كەلەشەك جەتكىنشىكتەر الىپ وقيدى دەپ وتىرمىز. بۇل تابىلمايتىن مۇمكىندىك. قازاقستاننان جىل سايىن مۇنداي كىتاپتار كەلىپ تۇرادى. «وتانداستار» قوعامدىق قورى بىلتىر دا ءبىراز كىتاپ تاپسىرىپ كەتكەن. جىل سايىن وقۋلىقتار كەلىپ تۇرادى. ءبىزدىڭ ورتا مەكتەپتەر كوبىنە قازاقستان وقۋلىعىن پايدالانادى. سوندىقتان بۇل اسا ورايلى مۇمكىندىك بولدى، − دەدى سۇلتان تاۋكەي ۇلى تىلشىلەرگە بەرگەن سۇحباتىندا.
بۇعان دەيىن موڭعوليادا قازاقستاندىق ۋنيۆەرسيتەت فيليالىن اشۋ ۇسىنىلعان ەدى. ويتكەنى بۇل ەلدەن بىزگە كەلىپ تە وقيتىن جاستار كوپ.
ەسكە سالساق، بىلتىر 28-29 -قازان كۇندەرى پرەزيدەنت قاسىم-جومارت توقايەۆ موڭعولياعا مەملەكەتتىك ساپارمەن بارعان ەدى.
اۆتور
ايجان سەرىكجان قىزى
