موڭعوليادا قوي قىرقۋ بويىنشا ۇلتتىق «التىن قايشى - 2025» بايقاۋى ءوتتى
استانا. KAZINFORM - تۋۆ ايماعىنىڭ زۋۋنمود سومونىندا موڭعوليا پرەزيدەنتى ۋحنااگين حۇرەلسۇحتىڭ قامقورلىعىمەن العاشقى ۇلتتىق «التىن قايشى - 2025» قوي قىرقۋ بايقاۋى ءوتتى.
بايقاۋدىڭ ماقساتى - مال شارۋاشىلىعىنان الىناتىن شيكىزاتتى قايتا وڭدەۋدى ارتتىرۋعا، قوي ءجۇنىنىڭ قۇندىلىعىن كوتەرۋگە، ونى قالدىقسىز پايدالانۋعا جانە جۇننەن جاسالاتىن دايىن ونىمدەردى قولداۋعا باعىتتالعان «اق التىن» ۇلتتىق قوزعالىسىن جانداندىرۋ. «التىن قايشى - 2025» ۇلتتىق بايقاۋى قوي قىرقۋدىڭ ءتيىمدى ادىستەرى مەن تەحنولوگيالارىن ەنگىزۋگە، مالشىلاردىڭ جۇمىسىن جەڭىلدەتۋگە جانە بۇل كاسىپكە جاستاردى تارتۋعا مۇمكىندىك بەرەدى.
بايقاۋ ءۇش اتالىم بويىنشا ءوتتى: ءداستۇرلى قايشىمەن قىرقۋ، ەلەكتروندى قايشىمەن قىرقۋ جانە كاسىبي قىرقۋ. قازىلار القاسىنىڭ قۇرامىنا اۆستراليادان كەلگەن مامان، جاڭا زەلانديادان جەتى مامان، سونداي- اق مالشىلار، عالىمدار مەن زەرتتەۋشىلەر كىردى.
«التىن قايشى» قوي قىرقۋ بويىنشا حالىقارالىق بايقاۋى العاش رەت 1961-جىلى جاڭا زەلانديادا ۇيىمداستىرىلعان بولاتىن. بۇگىندە الەمنىڭ 15 ەلىندە بۇل بايقاۋ جەرگىلىكتى ەرەكشەلىكتەرگە ساي تۇراقتى تۇردە وتكىزىلەدى.
بايقاۋ اياسىندا ءجۇن مەن كاشەميردەن جاسالعان بۇيىمداردىڭ كورمەسى، ءسان كورسەتىلىمى، ءجۇن وڭدەۋ ادىستەرى، ساداق اتۋ جانە شوپاندار اراسىنداعى ءان بايقاۋى دا ءوتتى.
18 ايماقتان كەلگەن 19 بەن 70 جاس ارالىعىنداعى 100-دەن استام شوپان «التىن قايشى - 2025» بايقاۋىنا قاتىستى. ءار اتالىم بويىنشا جەڭىمپازدار پرەزيدەنت كۋبوگىمەن ماراپاتتالدى، ال ەلەكتروندى قايشىمەن قىرقۋ ساناتىنداعى جەڭىمپازدار 2026 -جىلى وتەتىن قوي قىرقۋدان الەم چەمپيوناتىنا قاتىسۋ قۇقىعىن جەڭىپ الدى.
ايتا كەتەلىك موڭعوليادا قوي قىرقۋ بويىنشا الەمدىك سايىس وتەتىنى تۋرالى جازعان ەدىك.
