موڭعوليادا العاش رەت «ءسۇت فەستيۆالى - 2025» وتەدى
استانا. KAZINFORM - جىل سايىن 1-ماۋسىمدا بۇكىل الەمدە دۇنيەجۇزىلىك ءسۇت كۇنى تويلانادى، دەپ حابارلايدى مونتسامە.
ءسۇتتىڭ، ءسۇت ونىمدەرىنىڭ پايداسى مەن ءسۇت ونەركاسىبىنىڭ ماڭىزدىلىعى تۋرالى قوعامنىڭ حاباردارلىعىن ارتتىرۋ ماقساتىندا موڭعوليا تاريحىندا العاش رەت «ءسۇت فەستيۆالى - 2025» («Milk Festival 2025») ۇيىمداستىرىلادى.
دۇنيەجۇزىلىك ءسۇت كۇنى العاش رەت 2001 -جىلى ب ۇ ۇ- نىڭ ازىق-تۇلىك جانە اۋىل شارۋاشىلىعى ۇيىمىنىڭ (FAO) باستاماسىمەن وتكىزىلگەن. بۇعان دەيىن بۇل كۇن موڭعوليادا تەك ءسۇت ونەركاسىبى قىزمەتكەرلەرىنىڭ اراسىندا اتاپ وتىلەتىن. بيىل بۇل مەرەكە كەڭ كولەمدە ۇيىمداستىرىلماق.
«ءس ۇ ۇ» ، «ادۋ دەيري»، «تەسو فۋۋد»، «ۆيتافيت ميلك» جانە «مونفرەش» سەكىلدى ءىرى ۇلتتىق ءسۇت جانە ءسۇت ونىمدەرىن ءوندىرۋشى كومپانيالار موڭعوليانىڭ ازىق-تۇلىك، اۋىل شارۋاشىلىعى جانە جەڭىل ونەركاسىپ مينيسترلىگىمەن، FAO جانە موڭعوليانىڭ ءسۇت ونەركاسىبى فەدەراتسياسىمەن بىرلەسە وتىرىپ، ەل استاناسىنىڭ ۇلتتىق پاركىندە حالىق ءۇشىن اشىق ەسىك كۇنىن وتكىزەدى.
فەستيۆالدىڭ ماقساتى - اسىرەسە بولاشاق ۇرپاق سانالاتىن بالالار اراسىندا ءسۇت پەن ءسۇت ونىمدەرىنىڭ ماڭىزىن ناسيحاتتاپ، ولاردى كۇندەلىكتى ءومىردىڭ ءبىر بولىگىنە اينالدىرۋ.
فەستيۆال بارىسىندا ءىرى ۇلتتىق كومپانيالار ءسۇت ونىمدەرىمەن تانىستىرىپ، بالالارعا سىيلىقتار تاراتادى جانە ءدام تاتۋلار ۇيىمداستىرادى. سونىمەن قاتار بالالارعا ارنالعان كوركەم جانە مادەني ءىس- شارالار، ءتۇرلى ويىندار، «كوسپلەي» بايقاۋى، تەاترلىق جانە سيركتىك قويىلىمدار وتەدى.
ايتا كەتسەك، دۇنيەجۇزىلىك ءسۇت كۇنى موڭعوليادا العاش رەت 2016 -جىلى اتاپ وتىلگەن بولاتىن.
بۇدان بۇرىن موڭعوليادا العاش رەت «التىن قايشى - 2025» اتتى قوي قىرقۋ بويىنشا حالىقارالىق بايقاۋ وتەتىنى ءمالىم بولدى.
