موڭعوليا - ساياحات ءۇشىن ۇزدىك ەلدىڭ ءبىرى

Lonely Planet - ساياحات تۋرالى اقپارات تاراتاتىن الەمدەگى ەڭ تانىمال تۋريستىك باسىلىمداردىڭ ءبىرى. جاقىندا 50 جىلدىعى قارساڭىندا باسىلىم موڭعوليانى 2024-جىلى ساياحاتتاۋعا بولاتىن ۇزدىك ەلدەردىڭ قاتارىنا قوستى.

Kazinform بۇل تۋرالى مونتسامە اگەنتتىگىنە سىلتەمە جاساپ حابارلايدى.

موڭعولياعا بارۋدى جوسپارلاپ جۇرگەن تۋريستەر ەرەكشە تابيعات، ۇلتتىق مۋزىكا، بۋۋز سىندى تاعامدارعا تامسانىپ، ناادام ءداستۇرلى مەرەكەسىنە قاتىسىپ، اتپەن سەرۋەندەي الادى.

سونىمەن قاتار، ورحون وزەنى اڭعارى تابيعي كەشەنى مىندەتتى تۇردە كورۋ كەرەك ورىن رەتىندە ۇسىنىلعان.

مادەنيەت مينيسترلىگىنىڭ حابارلاۋىنشا، موڭعوليا ۇكىمەتى 2023-2025-جىلداردى «موڭعولياعا ساياحاتتاۋ جىلدارى» دەپ جاريالاعان.

موڭعوليانى دامىتۋ جۇمىستارىن كەزەڭ-كەزەڭىمەن ورىنداۋ - اۋە كولىگىن جەڭىلدەتۋ، سيفرلىق تۋريزمگە كوشۋ، حالىقارالىق تۋريستىك ستاندارتتاردى ەنگىزۋ وڭ ناتيجە كورسەتىپ جاتىر.