موڭعوليا پرەزيدەنتى قازاقستاننىڭ سىرتقى ىستەر ءمينيسترىن قابىلدادى

ۇلانباتىر. KAZINFORM – ق ر پرەمەر-ءمينيسترىنىڭ ورىنباسارى - سىرتقى ىستەر ءمينيسترى مۇرات نۇرتىلەۋ موڭعوليا پرەزيدەنتى ۋحنااگين حۋرەلسۋحتىڭ قابىلداۋىندا بولدى. ەلىمىزدىڭ سىرتقى ىستەر ءمينيسترى 19 جىلدا العاش رەت موڭعولياعا رەسمي ساپارمەن باردى.

كەزدەسۋ بارىسىندا م. نۇرتىلەۋ قازاقستان پرەزيدەنتى قاسىم-جومارت توقايەۆتىڭ شىنايى تىلەكتەرى مەن ىستىق سالەمىن جەتكىزدى. ءوز كەزەگىندە موڭعوليا پرەزيدەنتى استانانىڭ ۇلانباتىر ءۇشىن ماڭىزدى ستراتەگيالىق سەرىكتەس ەكەنىن اتاپ ءوتىپ، ساياسي ديالوگتى ودان ءارى نىعايتۋعا مۇددەلى ەكەنىن ءبىلدىردى.

م. نۇرتىلەۋ موڭعوليا قازاقستانمەن ورتاق تاريحي تامىرلارمەن، سونداي-اق رۋحاني جانە مادەني جاقىندىقپەن بايلانىستى سەنىمدى ءارى جاقىن كورشى ەكەنىن مالىمدەدى.

تاراپتار بيىك جانە جوعارى دەڭگەيدەگى، سونىڭ ىشىندە ۇكىمەتتىك جانە پارلامەنتارالىق ساپارلارمەن الماسۋ جونىندە ۋاعدالاستى. ساياسي، ساۋدا-ەكونوميكالىق جانە مادەني-گۋمانيتارلىق سالالارداعى ىنتىماقتاستىقتىڭ جاي-كۇيى مەن دامۋ پەرسپەكتيۆالارى، حالىقارالىق قۇرىلىمدار اياسىنداعى بىرلەسكەن جۇمىس تالقىلانعان.

سونىمەن بىرگە، بۇگىن قازاقستان ءسىم باسشىسى موڭعوليا پرەمەر-ءمينيسترى گومبوجاۆىن زاندانشاتارمەن دە جەكە كەزدەسۋ وتكىزدى. قازاقستان مەن موڭعوليا ەكىجاقتى تاۋار اينالىمىن 500 ميلليون ا ق ش دوللارىنا دەيىن جەتكىزۋدى كوزدەپ وتىر، بۇل ماقساتقا قازاقستاندىق استىق پەن باسقا دا اۋىل شارۋاشىلىعى ونىمدەرىن جەتكىزۋدى ۇلعايتۋ ارقىلى قول جەتكىزىلمەك.

سونداي-اق تاۋ-كەن ونەركاسىبى مەن ماشينا جاساۋ سالالارىنداعى ىنتىماقتاستىق پەرسپەكتيۆالارى قوزعالدى. قازاقستان بىرلەسكەن گەولوگيالىق بارلاۋ جۇمىستارىن جۇرگىزۋگە جانە جوعارى تەحنولوگيالىق ءونىم جەتكىزۋگە قىزىعۋشىلىق ءبىلدىردى. مادەني-گۋمانيتارلىق سالادا مينيستر بىرلەسكەن جوبالاردى ودان ءارى ۇلعايتۋعا قازاق تاراپىنىڭ ءازىر ەكەنىن ءبىلدىردى.

ايتا كەتەيىك، كەلەر جىلى موڭعوليا پرەزيدەنتى ۋحنااگين حۋرەلسۋح قازاقستانعا ساپارمەن كەلەدى.

قازاقستان مەن موڭعوليانىڭ سىرتقى ىستەر مينيسترلەرى كولىك-لوگيستيكا سالاسىنداعى كەدەرگىلەر مەن قيىندىقتاردى جويۋ، جاڭا كولىك باعىتتارىن قۇرۋ، اۋە رەيستەرىنىڭ سانىن ارتتىرۋ، ازاماتتار اراسىنداعى ءوزارا ساپار اعىنىن كوبەيتۋ، يمپورت پەن ەكسپورت كولەمىن ۇلعايتۋ، سونداي-اق كاسىپكەرلەرگە قولايلى ىسكەرلىك ورتا قالىپتاستىرۋ باعىتىندا بىرلەسكەن جۇمىس جۇرگىزۋگە ۋاعدالاستى.

رەسمي ساپار اياسىندا موڭعولياداعى قازاق دياسپوراسىنا 5 مىڭ دانا كىتاپ جەتكىزىلدى.