موڭعوليا پرەمەر-ءمينيسترى قىزمەتىنەن بوساتىلدى

استانا. قازاقپارات – 27-ناۋرىزدا موڭعوليانىڭ ۇلى مەملەكەتتىك حۋرالىنىڭ (پارلامەنت) پلەنارلىق وتىرىسىندا پرەمەر-مينيستر گومبوجاۆىن زاندانشاتاردىڭ قىزمەتىنەن بوساتۋ تۋرالى ءوتىنىشى قارالدى، دەپ حابارلايدى مونتسامە.

وتىرىس بارىسىندا ول مەملەكەت پەن حالىق مۇددەسىن ءبىرىنشى ورىنعا قويىپ، وكىلەتتىگىن توقتاتۋ تۋرالى شەشىم قابىلداعانىن ايتتى.

- مەن قىزمەتىمە جابىسىپ وتىرعان جوقپىن. مەملەكەت پەن حالىق مۇددەسىن ءبىرىنشى ورىنعا قويىپ، وكىلەتتىگىمدى توقتاتۋ تۋرالى شەشىم قابىلدادىم. بۇل جاي عانا قىزمەتتى تاپسىرۋ ەمەس، ساياساتكەرلەردىڭ ماڭىزدى مۇددەلەر جولىندا بىرىگە ءبىلۋىنىڭ ۇلگىسى، - دەدى گومبوجاۆىن زاندانشاتار.

دەپۋتاتتاردىڭ سۇراقتارىنا جاۋاپ بەرىپ، تۇسىنىكتەمە جاساعاننان كەيىن زاندانشاتار سوڭعى توعىز ايداعى اتقارىلعان جۇمىستار بويىنشا ەسەپ بەردى.

ول ءوز سوزىندە 2025-جىلى العاش رەت مەملەكەتتىك شىعىندار 2,2 تريلليون تۋگريككە قىسقارعانىن ايتتى.

- ناتيجەسىندە كومىر ەكسپورتى 90 ميلليون تونناعا جەتىپ، جالپى ەكسپورت كولەمى 15,8 ميلليارد ا ق ش دوللارىن قۇراعان. كاشەمير ەكسپورتى 4,7 ەسە، ەت ەكسپورتى %25,7 عا ارتقان. ەكونوميكالىق ءوسىم 2,6 پايىزدان 6,8 پايىزعا دەيىن جەدەلدەپ، ينفلياتسيا 8,3 پايىزدان 6,5 پايىزعا تومەندەگەن. تولەم بالانسى 600 ميلليون دوللار تاپشىلىقتان 1 ميلليارد دوللار پروفيتسيتكە شىققان. ۆاليۋتالىق رەزەرۆتەر 2,1 ميلليارد دوللارعا ءوسىپ، تاريحي ماكسيمۋم - 7 ميلليارد دوللارعا جەتكەن، - دەدى پرەمەر-مينيستر.

داۋىس بەرۋ قورىتىندىسى بويىنشا دەپۋتاتتاردىڭ 74 پايىزى ونىڭ وتستاۆكاسىن قولدادى.

گومبوجاۆىن زاندانشاتار جاڭا پرەمەر-مينيستر تاعايىندالعانعا دەيىن ۋاقىتشا ۇكىمەت باسشىسى مىندەتىن اتقارادى.