موڭعوليا ءتورت مەملەكەتپەن ديپلوماتيالىق قاتىناس ورناتتى
استانا. KAZINFORM - موڭعوليا پارلامەنتىنە ب ۇ ۇ- عا مۇشە ءتورت مەملەكەتپەن ديپلوماتيالىق قاتىناس ورناتۋ تۋرالى قاۋلى جوباسى ەنگىزىلدى، دەپ حابارلايدى مونتسامە.
2025-جىلعى 27-ماۋسىمدا موڭعوليانىڭ سىرتقى ىستەر ءمينيسترى باتمۋنحيين باتتسەتسەگ موڭعوليانىڭ ۇلى مەملەكەتتىك حۋرالىنىڭ ءتوراعاسى داشزەگۆيين امارباياسگالانعا ءتورت مەملەكەتپەن ديپلوماتيالىق قاتىناس ورناتۋ تۋرالى قاۋلى جوباسىن ۇسىندى.
بۇل باستاما 2013-جىلى موڭعوليانىڭ ۇلتتىق قاۋىپسىزدىك كەڭەسىنىڭ شەشىمىنە سايكەس بارلىق بۇۇ- عا مۇشە مەملەكەتتەرمەن ديپلوماتيالىق قاتىناس ورناتۋ ماقساتىندا جۇرگىزىلگەن جۇمىستىڭ ناتيجەسى سانالادى. ناتيجەسىندە ەسۆاتيني كورولدىگى، باربادوس رەسپۋبليكاسى، ترينيداد جانە توباگو رەسپۋبليكاسى جانە بوتسۆانا رەسپۋبليكاسىمەن ديپلوماتيالىق قاتىناس ورناتۋ تۋرالى بىرلەسكەن كومميۋنيكەگە قول قويىلدى.
- ءتيىستى تاراپتارمەن جۇرگىزىلگەن جۇمىس ناتيجەسىندە بۇل ءتورت مەملەكەتپەن ديپلوماتيالىق قاتىناس رەسمي تۇردە ورناتىلدى. وسىلايشا، ب ۇ ۇ- نىڭ 192 مۇشە مەملەكەتىنىڭ بارلىعىمەن ديپلوماتيالىق قاتىناس ورناتۋ ماقساتى تولىعىمەن ورىندالدى، - دەپ اتاپ ءوتتى مينيستر باتتسەتسەگ.
سونداي-اق، سىرتقى ىستەر ءمينيسترى باتتسەتسەگ موڭعوليانىڭ بارلىق ب ۇ ۇ مۇشەلەرىمەن ديپلوماتيالىق بايلانىس ورناتقان ساناۋلى ەلدەردىڭ ءبىرى ەكەنىن ايتىپ، بۇل جەتىستىك ەلدىڭ بەلسەندى ديپلوماتيالىق قىزمەتىن، بەيبىتسۇيگىش، اشىق، تاۋەلسىز جانە كوپۆەكتورلى سىرتقى ساياساتىن كورسەتەتىنىن ەرەكشە اتاپ ءوتتى.
وسىعان دەيىن حابارلانعانداي، قازاقستان مەن موڭعوليا اراسىنداعى جول قاشىقتىعى 800 شاقىرىمعا دەيىن قىسقارادى.
