موڭعول ەنسيكلوپەدياسىنىڭ العاشقى بەتىندە اباي تۇر

استانا. قازاقپارات - «موڭعول حالقى قازاق كلاسسيكتەرىن ماقتان تۇتادى»، دەيدى موڭعول ۇلتتىق عىلىم اكادەمياسىنىڭ اكادەميگى يسلام قابىش ۇلى.

«مەن موڭعوليا مەن قازاق ەلىنىڭ اراسىندا 50 جىلداي ەڭبەك ەتتىم. ەڭ العاش مۇحتار اۋەزوۆتىڭ «كوكسەرەگىنەن» باستاپ، «اباي جولىنا» دەيىن اۋداردىم. ودان كەيىن ءىلياس ەسەنبەرليننىڭ «كوشپەندىلەرىن»، ابايدىڭ تولىق جيناعىن موڭعول تىلىندە سويلەتتىم. قازاقتىڭ ۇلى تۇلعالارىنىڭ شىعارمالارىن موڭعول تىلىنە اۋداردىم»،-دەيدى  موڭعول ۇلتتىق عىلىم اكادەمياسىنىڭ اكادەميگى، تاريح عىلىمدارىنىڭ دوكتورى، پروفەسسور، اۋدارماشى، پۋبليسيست، دراماتۋرگ، موڭعول مەملەكەتىنىڭ عىلىمعا ەڭبەك سىڭىرگەن قايراتكەرى يسلام قابىش ۇلى.

«موڭعول ەلى قازاق ادەبيەتىن بۇرىن بىلمەيتىن. ال قازىر ۇلى ابايدى قازاقتار قالاي تۇسىنسە، موڭعولدار دا سولاي تۇسىنەدى دەپ نىق سەنىممەن ايتا الامىن. موڭعول ەنسيكلوپەدياسىنىڭ العاشقى بەتىندە اباي تۇر. مۇحتار اۋەزوۆتىڭ «كوكسەرەگى» ءۇش رەت مەكتەپ وقۋلىعىنا كىردى. موڭعول حالقى قازاق كلاسسيكتەرىن ماقتان تۇتادى»،-دەيدى يسلام قابىش ۇلى.

«قازاقستان» تەلەارناسى