موبيلدى اۋدارىمداردى بالالاردىڭ شوتىنا جىبەرۋگە بولا ما
استانا. KAZINFORM - موبيلدى اۋدارىمداردى بالالاردىڭ شوتىنا جىبەرۋگە بولا ما جانە ونىڭ بارىسى قالاي قاداعالانادى؟ بۇل ساۋالعا قارجى مينيسترلىگى مەملەكەتتىك كىرىستەر كوميتەتى ءتوراعاسىنىڭ ورىنباسارى قايرات مياتوۆ جاۋاپ بەردى.
ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتى بارىسىندا «ەگەر جەكە كاسىپكەر بالاسىنىڭ شوتىنا (ۇيالى تەلەفونىنا) كوپ اۋدارىم جاساسا، بالانىڭ جەكە دەرەگى سالىق ورگاندارىنا بەرىلە مە؟ تەكسەرىس جۇرە مە؟» دەگەن ساۋال قويىلدى.
«بۇل جاعدايدا اۋدارىم ماسەلەسىن ەكىنشى دەڭگەيلى بانكتەر شەشەدى. ال شەكتەن تىس اۋدارىم جاسالعانى تۋرالى اقپارات بىزگە كەلىپ تۇسسە، وندا باقىلاۋعا الامىز. مەنىڭ بىلۋىمشە، زاڭ بويىنشا بالالارعا مۇلىككە يەلىك ەتۋگە شەكتەۋ جوق، ال كاسىپكەرلىك بويىنشا بۇل ماسەلە اشىق كۇيدە قالىپ وتىر»، - دەپ جاۋاپ بەردى قارجى مينيسترلىگى مەملەكەتتىك كىرىستەر كوميتەتى ءتوراعاسىنىڭ ورىنباسارى قايرات مياتوۆ.
ونىڭ ايتۋىنشا، ءار جاعداي بويىنشا ماسەلە جەكە قارالادى.
بۇعان دەيىن موبيلدى اۋدارىمداردى تۋىس-تانىستار ارقىلى قابىلداۋعا تىيىم سالىنباعانى تۋرالى حابارلاعان ەدىك.
ودان بولەك، قارجى ۆيتسە-ءمينيسترى ەرجان ءبىرجانوۆ موبيلدى اۋدارىمنىڭ ارتىق تۇستارى تۋرالى ايتىپ بەردى.
