مۇستافا وزتۇرىكتىڭ تۋعان كۇنىنە وراي استانادا ۆەلوشەرۋ وتەدى
استانا. KAZINFORM - بەلگىلى ۆەلوشاباندوز ەرنات مەلس ۇلى راحمەتوللا 23-قاراشا سەنبى كۇنى استانا قالاسىندا ۆەلوشەرۋ وتكىزەدى، دەپ حابارلايدى تۇركيالىق «TRT» اقپاراتتىق پورتالى.
اتالعان ب ا ق-تىڭ دەرەگىنشە، قازاقستان تاەكۆوندو فەدەراتسياسىنىڭ نەگىزىن قالاۋشى، تاەكۆوندودان قارا بەلبەۋ 6 دان يەگەرى، حالىقارالىق دارەجەدەگى جاتتىقتىرۋشى مۇستافا وزتۇرىكتىڭ تۋعان كۇنىنە وراي ۇيىمداستىرىلعان شەرۋ «بايتەرەك» ەسكەرتكىشىنىڭ الدىنان باستالىپ، سول جەردە اياقتالادى.
اتى اڭىزعا اينالعان دارا تۇلعا مۇستافا كابەن ۇلى وزتۇرىكتى ەسكە الۋ، رۋحىنا تاعزىم ەتۋ، ونەگەلى ءومىرى مەن ەڭبەگىن دارىپتەۋگە ۇلەس قوسۋ ماقساتىندا ۇيىمداستىرىلعان ۆەلوشەرۋ سونىمەن بىرگە قازاق پەن تۇرىككە ورتاق ۇل ارقىلى قازاقستان مەن تۇركيانىڭ باۋىرلاستىعىن، دوستىعىن ناسيحاتتايدى.
جاستاردى وتانسۇيگىشتىككە، ەل ءۇشىن ەرەن ەڭبەك ەتۋگە، قايسار بولۋعا ۇندەپ جۇرگەن ۆەلوسپورتتان قازاقستاننىڭ 3 دۇركىن رەكوردشىسى، جۋرناليست ەرنات راحمەتوللا وسى جوباسىن استانانىڭ قيىن اۋا شارتتارىندا جالعىز ءوزى اتقارىپ شىعۋعا بەل بۋىپ وتىر.
«2022 -جىلى 55 كۇندە 5555 شاقىرىم ءجۇرىپ، احمەت بايتۇرسىن ۇلىنىڭ تۋعانىنا 150 جىل مەرەيتويىنا ارناپ تورعاي، اقكول، سارىتۇبەكتەن باستاپ، قوستاناي، اقتوبە، اتىراۋ، ماڭعىستاۋ وبلىستارى جانە گرۋزيا، تۇركيا اۋماعى ارقىلى ستامبۋلدىڭ گۇنەشلى اۋدانىنداعى مۇستافا وزتۇرىك جەرلەنگەن زيرات باسىندا شەرۋىن اياقتاعان ەرناتپەن انكارا جۇرتشىلىعى دا تانىس»، - دەپ جازادى تۇركيالىق باسىلىم.
ايتا كەتەيىك، ەرنات مەلس ۇلى بۇعان دەيىن رەسپۋبليكالىق جانە حالىقارالىق دەڭگەيدە 14 ۆەلوشەرۋ وتكىزگەن.
اۆتور
بەيسەن سۇلتان ۇلى
