مەرەكەلىك تارتۋ: قوسشى قالاسىندا 20 وتباسى باسپانالى بولدى
كوكشەتاۋ. KAZINFORM - استانا كۇنىنە بايلانىستى قوسشىدا 20 وتباسىنا پاتەر كىلتى تابىس ەتىلدى.
اقمولا وبلىسى اكىمدىگى باسپا ءسوز قىزمەتىنىڭ مالىمەتىنشە، وڭىردە حالىقتى باسپانامەن قامتاماسىز ەتۋ بويىنشا بەلسەندى جۇمىستار جۇرگىزىلۋدە. وبلىس ورتالىعى مەن زەرەندى اۋدانىنداعى وتباسىلار جايلى ۇيلەردەن پاتەرلى بولدى.
قوسشى قالاسىندا حالىقتىڭ الەۋمەتتىك توپتارىنان شىققان 20 وتباسى – ۇ و س ارداگەرىنە، كوپ بالالى انالار مەن اتا-اناسىنىڭ قامقورلىعىنسىز قالعان جاستارعا «Dream Park» تۇرعىن ءۇي كەشەنىنەن جاڭا پاتەردىڭ كىلتى تابىس ەتىلدى.
قۋانىش يەلەرىن اقمولا وبلىسىنىڭ اكىمى مارات احمەتجانوۆ قۇتتىقتادى.
«بۇگىنگى ءىس-شارا مەملەكەت باسشىسىنىڭ قازاقستاندىقتاردىڭ ءومىر ءسۇرۋ ساپاسىن ارتتىرۋعا باعىتتالعان ساياساتىنىڭ ايقىن كورسەتكىشى جانە ناقتى جۇزەگە اسىرىلۋىنىڭ كورنىسى. ءوز شاڭىرعاعىڭدا ءومىر ءسۇرۋ - ءار وتباسى ءۇشىن ۇلكەن مەرەكە. وڭىردە جاڭا تۇرعىن ۇيلەردىڭ قۇرىلىسى قارقىن الۋدا. تەك سوڭعى جىلدارى وبلىستا تۇرعىن ءۇي قۇرىلىسىنا 200 ميلليارد تەڭگەدەن استام ينۆەستيتسيا تارتىلىپ، 2 ميلليون شارشى مەترگە جۋىق تۇرعىن ءۇي پايدالانۋعا بەرىلدى. ناتيجەسىندە، شامامەن 12 مىڭ اقمولالىق وتباسى باسپانا ماسەلەسىن شەشە الدى»، - دەدى وبلىس اكىمى.
پاتەر العانداردىڭ قاتارىندا قوسشى قالاسىنىڭ جاس تۇرعىندارى ماكسيم مۋشتاەنكو مەن ۆلاديمير گلازكوۆ بار.
«مەن ءوز نەمەرەلەرىمنىڭ قامقورشىسىمىن. ءبىز بۇگىنگى قۋانىشتى ۇزاق كۇتتىك. مەملەكەت باسشىسىنا ازاماتتار ءۇشىن قولايلى جاعدايلار جاساپ، باسپانا ماسەلەسىن شەشىپ، قامقورلىق تانىتىپ جاتقانىنا العىسىمدى بىلدىرەمىن» - دەيدى ماكسيمنىڭ اتاسى لەونيد مۋشتاەنكو.
ايتا كەتسەك، قوسشى قالا مارتەبەسىن العاننان بەرى 267 مىڭ شارشى مەتردەن استام تۇرعىن ءۇي پايدالانۋعا بەرىلىپ، 2384 وتباسى باسپانامەن قامتىلدى.
وبلىس اكىمىنىڭ تاپسىرماسى بويىنشا جىل سوڭىنا دەيىن قوسشى قالاسىنان تاعى 100 گە جۋىق پاتەردى ازاماتتارعا ساتىپ الۋ جوسپارلانۋدا. بۇل شارا كوپ بالالى وتباسىلاردىڭ، جەتىمدەردىڭ، مۇگەدەكتەردىڭ جانە باسقا دا الەۋمەتتىك ماڭىزى بار ساناتتاعى تۇرعىنداردىڭ تۇرمىس جاعدايىن جاقسارتۋعا مۇمكىندىك بەرمەكشى.
ەسكە سالايىق، سۋ تاسقىنىنان زارداپ شەككەن ماكينسك قالاسىنىڭ تۇرعىندارى باسپانالى بولدى.
