Moody’s قىتايعا قاتىستى تەرىس بولجامدى وزگەرىسسىز قالدىردى

استانا. قازاقپارات - Moody’s حالىقارالىق رەيتينگ اگەنتتىگى قىتايعا قاتىستى «تەرىس» بولجامدى وزگەرىسسىز قالدىردى، دەگەنمەن، تاۋەلسىز نەسيە رەيتينگىن «ا1» دەڭگەيىندە راستادى.

Lianhe Zaobao باسىلىمىنىڭ حابارلاۋىنشا، Moody’s دۇيسەنبى كۇنى قىتايدىڭ «ا1» تاۋەلسىز نەسيە رەيتينگىن راستادى. اگەنتتىكتىڭ ايتۋىنشا، 2023-جىلى جەلتوقسان ايىندا قىتايدىڭ رەيتينگ بولجامى «تۇراقتىدان» «تەرىسكە» تومەندەتىلگەننەن بەرى، بولجامعا نەگىز بولعان فاكتورلار ايتارلىقتاي وزگەرگەن؛ جەرگىلىكتى مەملەكەتتىك قارىز بەن مەملەكەتتىك كاسىپورىنداردىڭ قارجىلىق جاعدايى ەندىگارى نەگىزگى تاۋەكەلدەر سانالمايدى.

Moody’s قىتاي ۇكىمەتىنىڭ ماقساتتى ساياساتىنىڭ ارقاسىندا ايتىلعان تاۋەكەلدەردىڭ ەداۋىر ازايعانىن، ەندىگارى «ا1» رەيتينگىنە ناقتى قىسىم تۇسىرمەيتىنىن اتاپ كورسەتتى.

الايدا، مامىر ايىندا قىتاي مەن ا ق ش اراسىندا تاريفتىك كەلىسىمگە قول قويىلعانىنا قاراماستان، Moody’s بولاشاق ساۋدا شەكتەۋلەرى مەن جاھاندىق ساۋدا اعىنىنداعى بەلگىسىزدىك تاۋەكەلدەرى ءالى ساقتالىپ وتىرعانىن اتاپ ءوتتى.

قىتايدىڭ قارجى مينيسترلىگى دۇيسەنبى كۇنى Moody’s- ءتىڭ قىتايدىڭ تاۋەلسىز نەسيە رەيتينگىن «ا1» دەڭگەيىندە ساقتاپ قالۋ تۋرالى شەشىمى ەل ەكونوميكاسىنىڭ وڭ ديناميكاسىندا دەگەن سەنىمنىڭ ايعاعى ەكەنىن مالىمدەدى.

مينيسترلىكتىڭ مالىمدەۋىنشە، وتكەن جىلدىڭ ءتورتىنشى توقسانىنان بەرى ەل بيلىگى كەشەندى ماكروەكونوميكالىق رەتتەۋ شارالارىن قابىلداعان. سونىڭ ناتيجەسىندە ەكونوميكالىق كورسەتكىشتەر جاقسارىپ، نارىقتىڭ بولجالى مەن سەنىمى نىعايىپ، قارىزدىڭ ورتا جانە ۇزاق مەرزىمدى تۇراقتىلىعى ارتا تۇسكەن. Moody’s- ءتىڭ شەشىمى وسى وڭ ۇدەرىستى راستاۋدىڭ كورىنىسى سانالادى.

مالىمدەمەدە سونداي-اق كەلەسى كەزەڭدە ەنگىزىلەتىن ءبىرقاتار جاڭا ساياسات پەن قولدانىستاعى شارالاردىڭ ءوزارا ارەكەتتەسىپ، ەل ەكونوميكاسىنىڭ جوعارى ساپالى دامۋى ءۇشىن بەرىك نەگىز قالايتىنى اتاپ كورسەتىلدى.

بۇعان دەيىن قىتاي بيلىگىنىڭ ەل تاريحىنداعى ەڭ قىمبات سۋ ارناسىن سالۋعا دايىندالىپ جاتقانىن جازعان ەدىك.