مەنىڭ ولاردان قاي جەرىم كەم؟ قۋات حاميتوۆ پرەزيدەنتتىك سايلاۋعا تۇسپەك
استانا. قازاقپارات - قازاقستاندىق تانىمال م م ا جاۋىنگەرى قۋات «نايمان» حاميتوۆ بولاشاقتا پرەزيدەنتتىك سايلاۋعا تۇسكىسى كەلەتىنىن ايتتى.
تانىمال سپورتشى بۇل جايىندا ءوزىنىڭ الەۋمەتتىك جەلىدەگى پاراقشاسىندا مالىمدەدى.
«قىسقاسى، مەن 2045-جىلى پرەزيدەنتتىككە تۇسەمىن دەپ شەشتىم! مەنىڭ ولاردان قاي جەرىم كەم؟ كەيبىرەۋلەر سياقتى حالقىنىڭ قانىمەن بايلىق جيناعان جوقپىن! ءبىزدىڭ ەلگە ەشقانداي رەفورما كومەكتەسپەيدى! بار بولعانى - ۇرلانعان ۇلتتىق بايلىقتى قايتارىپ، ونى ەكونوميكاعا قايتا قۇيۋ كەرەك!» - دەپ جازدى سپورتشى.
قۋات حاميتوۆ بۇعان دەيىن دە ساياسي امبيتسياسىن اشىق بىلدىرگەن. بىلتىر «ۆەستنيك م م ا» باسىلىمىنا بەرگەن سۇحباتىندا نەگىزى سايلاۋعا 2035-جىلى تۇسەتىنىن ايتىپ ەدى.
«سپورتتىق مانسابىمدى اياقتاعان سوڭ بەس جىل ىشىندە دەپۋتات بولۋعا تىرىسامىن. ال ون جىلدان كەيىن، مۇمكىن، پرەزيدەنت بولعىم كەلەر. سەبەبى دەپۋتاتتار ەشتەڭەنى وزگەرتپەيدى. سوندىقتان ون جىلدان كەيىن مەنى كۇتىڭىزدەر - پرەزيدەنت سايلاۋىنا قاتىسامىن»، - دەگەن ەدى قۋات حاميتوۆ.
